Chin ramri doawknak ah ralhraang ralkap 30 leng lo an thi

Thlanglam Kalay, Chin ramri ah mipi ralkap le ralhraang pawl ni 3 an doaw ih doawknak ah ralhraang ralkap 30 lenglo an thi, ti`n People`s Defence Force – Kalay in thu a suah.

Doawknak hmun hi Lairawn hmun dangdang ah a si ih nikhat nakah ralhraang ralkap 3, nihnih nakah 5, nithum nakah 20 luan ti`n ralhraang ralkap 30 lenglo an thi tiah theih a si.

Thazaang 200 hrawng a si mi ralhraang ralkap le Mipi ralkap ṭangkop pawl cu Kalay-Natchaung-Falam zin ih um Hakhalay khua ah July 11 ah an kapaw ih sunnihlawh deuh thaw an do aw.

Doawknak ah ralhraang ralkap 3 hrawng an thi tiah tarlang a si ih, mipi ralkap lam ah CNDF ralkap pakhat thi in RKDF ihsin mipakhat hriam a pu.

July 12 khalah Hakhalay saklam pantu Ke feh ralhraang ralkap cu Sitha khua kiangah mipi ralkap pawl in an rak do ih sun nazi 1 ihsin zaanlam nazi 3 tiang hrawng an kapaw.

Cuih ni doawknak ah ralhraang ralkap 5 thi in, mipi ralkap lam cu an him nan, ralhraang ralthuamtum kap mi in khawmi nauhak a kap ngah. Cuih zaan cu ralhraang ralkap pawl Sitha phungkitlawng ah an riak.

Nithumnak kahdonak cu Tharyakung khua kiang ah a si ih, July 13, zinglam nazi 9 ihsin zaanlam nazi 1 hrawng tiang an kapaw.

Doawknak ah ralhraang ralkap 20 hnak ih mal lo an thi ti`n Kalay PDF in thu a suah ih, mipi ralkap lam ah PDF Kalay ralkap pakhat nunnak liam in, CNDF ralkap pakhat in natuklo hriam a pu.

Ralhraang ralkap cu Tharyakung ihsin Kalay University ah an lut ih doawknak ih mithi ruak pawl cu mawṭaw thawn a nawl in an nawl, tiah PDF – Kalay thusuahmi ah an ngan tel.

Doawknak ah PDF – Kalay tatyin 1,2,5,6,7, CNDF – VAKOK, CNDF – NA, CDF (KKG), RKDF le mipi ralkap ṭangkop dang pawl an tel tiah thuthang kan thei.

Leave a Reply

Your email address will not be published. Required fields are marked *