CDM tuahtu Ralkap/Palik cun Ralhraang pawl thlaphang vansangin umter

Ralkap/Palik CDM luttu ṭhenkhat Australia an thleng zo thu a suak veten SAC ralhraang in thuthang diklo a si ti`n an mah ralkap sungah thuhla nasaten an theh darh.

Ralhraang in thu a darh veten NUG thawn pehzomawtu People’s Embrace cun ralhraang thusuah sawn cu a dik lo mi a si ti`n online thurel khawmnak ah an simfiang cu Ralhraang pawl an thin phang ih ralkap/paliktlan um lo dingin ziinkong phunphun an hawl.

Curuangah ralkap/palik CDM tuah duh pawl hrang lamzin sialsaktu People’s Embrace cun a hnuailam banngtukin sawmawknak thu an suah ve.

“A tang hrih mi ralkap/palik pawl teh Ralhraang bumnak ziang tik tiang so nan tuar ding?”

“Thu dik rel ngam lo in lakha a thupten ei rerotu ralhraang pawl cu adikmi lamzin zawhtu an si thei pei maw?”

“CDM na lut ruangah ni 1-2 men ah nun nuam in na um thei lo ding timi cu thudik a si ko ih, ralhraang ruangah mipi khalin harsatnak an tuar rero.”

“Asinan, mai duh nak lawng tuahin nuam ceentu ralhraang hrangah nunnak thaap harsa zetih na cetveih nak le mipi huat mi si hnak cun CDM lut ih harsa tuar cu a deem tuk rori sawn” tiah People’s Embrace cun palik/ralkap pawl CDM lut dingin sawmnak thu an suah a si.

Siarbet : Australia cozah in Myanmar rammi le ralkaptlan pawl hrang humvennak Visa a pe rero zo

Pulhnatpi boruak ah siseh, mihring painvo thawn pehparmi bawmnak le Fimzirnak thawn pehparin kan rampi bawmnak pe rero zotu Australia cozah in Kawl ram a buai hnu Thla 14 sungah Myanmar rammi humvennak hrang Visa a pe rero zo tiah theih a si.

Thuthang ṭhenkhat cun tubai hrawngin ralkaptlan CDM luttu pawl visa pek thok vekin an tarlang nan The Sydney Morning Herald cun “kan dung kum February 1 le tukum January 31 lakah Myanmar rammi humvennak hrang mipum 513 pawl hnen ah onshore visa pek an si” tiah a tarlang.

Onshore humanitarian visa lole onshore protection visa timi cu mi ram um thei nak Visa thi zo nan ram, phunhnam, biaknak lole ramkhelnak tivek thubuai ruangah mai ram ah a tlung ngam lotu pawl an pek mi ‘humvennak visa’ a si ….

Zovek pawl Visa an pek ti cu tarlang a si lo ih Australia cozah in tukum January thla ihsin beunak a pe mi Myanmar ralkap CDM lut tu mipahnih thawn hmaton thureltlangnak an nei thu le an tlannak Myanamr-Thailand ramri ih an him lo zia … tivek an rel mi pawl cu SMH in a tarlang.

Australia Department of Home Affairs khalin “a cangmi thil umtu dan siseh, bulpak in maw, cupawl kha pawl ti`n mibur in maw, ziangtin hmalaknak kan nei timi par ah zianghman thuhla kan suah lo ding” tiah thu an suah.

Cuhleiah visa cu ralkap CDM lut tapiang an pe lo ih an mah Australia cozah in pom thei cin an nei hleiah a diltu background le dinhmun pawl ah a ṭhumaw tiah theih a si.

Australia cozah in Myanmar ralkap CDM luttu Visa a pe thu cu Australia hrang NUG palai Dr Tun-Aung Shwe khalin a nemhnget ih “Thailand ihsin Australia ram ah a feh mi ralkaptlan pahnih ka thei mi an um” a ti.

“NUG cozah in Myanmar ralkap CDM tuahtu cohlang dingin Australia, New Zealand le US cozah in biakter.”

“International community le leitlunhuap cozah pawl in CDM tuahtu ralkap in cohlang sak a si le Ralhraang cozah a kekkuai zamrang thei ding” tiah a ti.

Atu Australia ram thlengzotu le Visa ngahzotu ralkaptlan (CDM lut tu) pawl cu NUG thawn hnaṭuan tlang, CDM tuah dingin ralkap hrang sangka ong ringringtu People’s Embrace theihpinak thawn Australia cozah in Visa a pe mi a si tiah theih a si.

Leave a Reply

Your email address will not be published. Required fields are marked *