Ca tlarhnih ruangah mipum ting teel in Aye Wutyi Thaung dungthlun colh san

Kawlram mihminthang Aye Wutyi Thaung in a dungthlun pawl a ti thinheng ih nikhat thilthu ah mipum ting teel in a dungthlun an colh san.

Ralhraang ralkap in Ko Jimmy le Phyo Zeya Thaw telin Thawngtlak 4 an that mi thuthang a suak hnu, mipi thisen sosang lai takah tuhlan kum 5 luan zo ih a rak post dah mi ca tlarhnih a share sal ih, ramsung thil cang rero laimi thawn a milaw lo ti`n a dungthlun pawl an lungawi thei lo.

Tlawng sayama bangin Hni hring le Kawr var thawn a zukaw mi ah “အနာဂါတ်ကိုပြောင်းလဲဖို့အတွက် ပစ္စုပ္ပန်ကိုအရင် ပြောင်းလဲဖို့လိုတာပေါ့နော်…..” ti`n caption a ngan ih mipakhat in “ni dang deuh ah share a theih lo maw si” ti`n a comment. “Tu ni ah a cang ruangah ka share mi a si” ti`n Aye Wutyi Thaung in a reply sal ih, comment screenshot cu Min Maw Kun in FB cahmai ah a tarlang.

Min Maw Kun cun bulpak huatawknak ruangah siloin tarlang ṭul rorimi a si ruangah ka share mi a si ti`n ca a ngan ve ih, screenshot a tarlang hnu reilote ah Aye Wutyi Thaung hmin cu Kawlram FB khawvel ah a lar nasa ih a dungthlun an colh san cupco.

Aye Wutyi Thaung in a zuk le ca tlarhnih a share mi cu a ti hlo lohli ih, a zuk dang pawl khal a thup thluh nan, cover zuk a tarlang mi ah ṭongkam sia hlir in comment ngantu an tam.

Kawlram mipi in an buaipi hlan ah FB cahmai ah dungthluntu million 2 kim zik a nei nan, a fan pawl in dungthlun an colh hnu, atu ca kan ngan tiangah 1.7 million follower lawng an tang.

Mipi hnen ah ngaidam a dil sal nan hnihsuahsai nak ah an hmang men.

Leave a Reply

Your email address will not be published. Required fields are marked *