ASEAN-China meeting ah Min Aung Hlaing telter hram dingin China in dilngen nan Hlawh Tling Lo

China ram hruaitu Xi Jinping le Brunei ram hruaitu Hassanal Bolkiah te pahnih ih kaihruai dingmi ASEAN-China meeting ah Ralhraangbawi Min Aung Hlaing telter dingin China cozah in dilngennak a nei nan ASEAN hruaitu pawl in an cohlang lo tiah theih a si.

Hmin tarlang lomi Cozah palai hnen ihsin thuthang dongtu Reuters tarlangmi ah “China cozah palai (Special Envoy of Asian Affairs) Sun Guoxiang in Singapore le Brunei ah feh in ASEAN-China meeting ah Min Aung Hlaing telter dingin a va dil nan an rak el” tiah an ngan.

Cuihtlun ah Malaysia le Indonesia ram khalin Min Aung Hlaing ai ah ramkhel thu thawn pehpar lomi palai sawn telter dingin an lungkim tiah an tarlang ih “Indonesia foreign minister Retno Marsudi cun Myanmar ramsung remdaihnak a suak hlanlo cu ramkhel thuthawn pehparmi ASEAN hmuhtonawknak pawl ah Myanmar ralhraang cozah palai telter hrih lo dingin a rel” tiah an ngan.

ASEAN cun kan dung meeting an nei ṭum ih thusuah vekin November 22 ih tuah dingmi ASEAN-China meeting ah Min Aung Hlaing le a ho pawl siloin ramkhelnak thawn a pehpar lomi Myanmar palai telter dingin thuthluknak an nei zo ih cuih thu cu China khalin a pom mei a ṭul thu, Sun Guoxiang in Min Aung Hlaing hnen ah a sim thei zo.

Asinan tuṭum ASEAN-China meeting hi China ṭuanvo lak bawm dingin Myanmar ram (co-ordinating country) an rak ruat cia. Cuti a si tikah online biakpawhawknak link (virtual links) tivek an tuahnak le thil ṭul dang neuhneuh ah Myanmar ram an telve ding ih, Cuih tikcucaan ṭha lak in Min Aung Hlaing khal a ti lang aw thei ti`n reuters thuthang cun a ngan a si.

Leave a Reply

Your email address will not be published. Required fields are marked *