A thih tiang rori rin um zetin PDF pawl bawmṭheutu Uifim Max

Ui fim pawl hi ralram ah an hmang ṭangkai thei zetih an pu le nunnak runtu khalah an cang ṭheu.

Ral hawltu le bomb hawltu tivek khalah an hmang ṭangkai zetih an tuah ṭuan mi i zirin sunloihnak ropi tivek tiang a dongtu khal an um.

Cuvek Ui fim, sunloihphu tiih ruahmi uifim pakhat cu PDF pawl in an zuat ve ih, kan duhdawt zetmi uifim Max cun a thih tiang rori rin um zetin ralhraang do in bawm tiah PDF ka si tiawtu mipakhat cun FB cahmai ah a tarlang.

“Pu le hrang ah rin um zetin hnaṭuan bawm ringringtu Uifim Max cun kum 17 a kim ah in thih san.”

“Tuhlan ihsin raldo in zirhtu kan pu le pawl hrang ah rin um zetin hna rak ṭuan ringringtu a si. Leiphum bomb hawlnak khalah siseh, hramlak ih ralkian pawl hawl hmu ṭheutu khal a si. Ralhraang donak ah a thih tiang rori hnaṭuantu Uifim Max cu sunloih a phu rori tiah kan ruat. Kan riahsiatnak langter nakah a dam lai ih a zuk pawl ka run tarlang” tiah PDF ka si tiawtu mipakhat cun a FB cahmai ah a tarlang.

Tlunlam ih tarlangmi Ui fim Max thu hi thudik a si maw silo ti cu a hran ten namhnget theih a si lo nan Ui fim thuanthu kan zoh tikah ralhraang donak ih hman ṭankai zet mi Uifim hmuh ding tampi an um.

Cuvek lakih hminthang Uifim pakhat cu Kuno tiah a hmin an ko. Anih hi ralram ih hman ding hrimhrim ih fimthiamnak zirh mi a si ih a ṭuanpi ralkap pawl khalin 100 ah 100 an rin san ngam.

Bomb le ralthuam ṭihnung theithiam dingin fim zirhmi a si ih ṭihnung ralthuam hawl phah in ralkap pawl hmai a hruai hai ih thla 5 sungah hlawh tling zetin operation 16 rori ah a tel ve.

Afim zia le ral ram ih a cangvai dan cu a kilkhawitu UK ralbawi pakhat in hitin a rel.

“2019, May thla ah a si ih helicopter par in kan ṭum hnu, tualrawn pakhat kan thlen ah machine gun thawn in kap ciamco. Van that thlak zetin hriamtuar pakhat hman umloten innpi compound sungah kan thleng.”

“Kuno in hmai in hruai ih zanthim a si thawn kan hmu thei lo mi bomb kam mi le ralthuam ṭihnung a hmu veten in sim thei lohli. Amah zarah kan him tisehla ka rel sual lo ding.”

“Hmunhim kan thlengin ralkap dang pawl cu an lan ih kan nih cu Kuno thawn kan tangta. Culai ah a lantu ralkap pawl kiangah rinlopin bomb an deng mi a puak kuai hlei ah machine gun thawn an kap ciamco.”

“Va bawm hai dingin Kuno ka thlah ih ṭihnak nei loin khawthim lakih ralhraang cu a va nam. Khawthim lakih ralhraang cun rinlopin a zawntu Kuno cu thinphang kap in a rak kap ciamco ih a Ke ah a kap ngah. Cuticing khalin Kuno cu a tlanhlo men lo. Ralhraangpa cu a nuai ciamco ih, cu sungah ralkap pawl in boruak an tidai thei. Kuno um lo sehla cu ziang dinhmun kan thleng ding ti ka ruat ngam lo” tiah Kuno kilkhawitu ralbawipa cun a rel.

Kuno cu a ke dunglam pahnih in hriam a tuar ih, thi lo dingin tuamhlawm a si hnu ah UK ram ah an tlunpi saal.

Kuno ralṭhatnak cu UK cozahpi in a theihpi ih sunloihnak ropi “PDSA Dickin Medal” cu November 2020 ah ropi zetin an hlan a si. Atu ahcun a hnaṭuan ihsin colh an pe ih a sung le pawl thawm nuam zetin an khawsa.

Leave a Reply

Your email address will not be published. Required fields are marked *