ပွင့်ဖြူ doawknak ihsin luatsuaktu PDF ralkap Annka

Mizaanzing, June 22 ah Magway ramṭhen, Pwintbyu peng ah doawknak rapthlak a suak ih ralhraang ralkap kut tuarin mipi ralkap 11 an thi.

PDF ralkap 20 lenglo tomi thilphur mawṭaw cu lamlak ihsin ralhraang ralkap pawl in an rak kham ih rinlopin kahdonak a suak mi a si.

Doawknak ah mipi ralkap 9 an thi cih ih mawṭaw mawngtu le a hmailam ih tovetu mi 2 cu netahnu ah an thi leh tiah ပွင့်ဖြူ PDF ṭuanvonei BoKyarGyi in a rel.

“Nungdam in mi 3 an kai. Pakhat cu an kap that. 2 cu hriamtuar celh lo in an nunnak a liam. An ruak pawl pakhat hman kan ngah lo. An mah ralhraang pawl in Thlanmual ah an urkaang” tiah a ti.

PDF ralkap pawl hi ပွင့်ဖြူ myone thawn ramri awmi Thayet le Kanma myone PDF ralkap pawl an si ih mawṭaw thawn ralthuam an phur lai ah MaeZali lilawn ihsin ralhraang thazang 50 hrawngin an rak kham.

Mawṭaw hmailam ih to mipathum an ṭumter zawn ah ralkap pahnih in mawṭaw dunglam an zoh tum ih cutin doawknak a suak cih tiah cuih hmun ihsin luatsuaktu PDF ralkap pakhat in a rel.

“Kahawknak a suak veten ralkap pawl in in kap natsat ruangah Lu daak in kah a rem thiam lo. Cun, bomb pakhat an deng lut ih mawṭaw sung ih um puakkuai thei ralthuam pawl thawn nasatukin puakkuainak a suak” tiah amahcun a ti.

PDF ṭuanvonei BoKyarGyi khalin “Mawṭaw sung ih puakkuai thei ralthuam a puak natsat ruangah tuvekin mithi an tam nak san a si” a ti.

A hmun ih thi cih ruak 9 sungah ruak 6 hrawng lawng an taksa a him. Culodang cu Lu bul, Ke parh bul, Kut parh bul le Tai tan tivek an si ih zo an si ti khal theihtheih an si lo ruangah zirzoinak kan nei bet rero ti`n amahcun a rel bet hrih.

MaeZali lilawn doawknak ihsin nungdamin luatsuaktu PDF ralkap 14 an um ti a si nan ziangtin an luat suak thei ti cu simfiahnak an tuah lo.

Ralhraang ralkap in an feh nak ziin ihsin an rak bawh cia dan ah Dalan thupeknak a um ding tiah ruah a si ih, ralhraang kut tuar in mipi ralkap tampi an thi hlei ah an phur mi ralthuam tampi an sung.

Tudinhmun ah doawknak kiangkap pawl ah ralhraang ralkap in PDF ralkaptlan an hawl nasa tiah theih a si.

Leave a Reply

Your email address will not be published. Required fields are marked *