Myanmar ramsuak Lungmankhung zunghruk bun tu Rihanna soisel hlawh
February 12, US, Arizona ih tuah mi Super Bowl lehpannak halftime show ah hlasakthiam Rihanna in Myanmar ram suak lungmankhung zunghruk a bun mi thawn pehparin Justice For Myanmar cun nasaten a soisel ih zunghruk tuahtu boycott dingin leitlun mipi hnen ah theihternak a tuah cih.
Leitlunhuap mihminthang pawl thuhla ngantu PageSix tarlang dan ah Rihanna bun mi Ruby zunghruk cu Kawlram suak a si ih US $1 million man hrawng si in tarlang a si.
A tuahtu cu New York hram bun Bayco Jewels LLC an si ih, Kawlram suak lungmankhung dangdang khal zuar mi an nei ruangah Justice For Myanmar cun ngol san dingin leitlun mipi a theihter mi a si.
“Rihanna khal hin Kawlram mipi lam ah ṭangin in dinpi seh. Super bowl halftime show ih a bun mi ruby zunghruk cu Kawlram suak a si. Mipi that rerotu SAC ralhraang sum hawl nak pakhat a si. Curuangah daan kalh lungmankhung pursum tuahnak titawp dingin in ṭanpi uh” tiah Justice For Myanmar cun Rihanna tag tel cih in a tarlang.
Justice For Myanmar cu Kawlram thawn pehpar mi thu le ralhraang ralkap pursum tuahnak thuthup siseh, an cangvai dan pawl leitlun mipi hmuh dingin le daan vekih hmalaknak nei thei nak dingah leitlun mipi hmuh ah Myanmar ram thu pholangtu pawlkom an si.
