Thihcilh rorin Ralhraang ralkap pawl Bomb khur ah hruaitu Upattlak nupate
Magway ramṭhen, Yesagyo peng ih kai khih tuar Ko Phe le Ma Cho (nupa) cun PDF sakhaan kan lo hmuh ding ti`n ralhraang ralkap pawl bomb khur ah hruai in ram le miphun hrangah nunnak an hlan tiah theih a si.
An pahnih in Urban Underground Revolution Force (UURF -YSO) ukhruainak hnuai ih um mipi ralkap an si ih February 18 ah daan pangai in kuh sih ding an si.
February 17 ah nu le pa pawl thawn tongaw in Thetaw khua ah zaankhat an riak ih cuih zaan ah ralhraang ralkap pawl in rinlopin khua luhcilh in an kai mi a si.
Southern YSO PDF ṭuanvonei mipakhat cun “an pahnih in Urban Underground Revolution Force (UURF – YSO) hnuai ih um an si nan kan hnen khalah an um. Ral kan do tlang.”
“Ralhraang ralkap kaih an tuar hnu ah PDF umnak kan lo hmuh ding ti`n bomb kam nak hmun ah an hruai. Bomb puak ah ralhraang thi le hriam tuar an um ih an mah pahnih khal cu ralhraang kut tuar in an nunnak a liam ve.”
“Kan thi ding ti thei cingin ram le miphun hrang nunnak an hlan ih kan nih a tang hrih mi ralkap pawl in upatnak sangbik kan pe. Hmailam khalah nunnak thapin hmai kan nor vivo ding” tiah a ti.
Ralhraang ralkap in Thetaw khua an luhcilh hnu, Southern YSO PDF sakhaan lam an pan laifang ah mipi ralkap ṭangrual pawl in bomb an puahhnawh ih mithi 2 le hriamtuar 3 an um tiah theih a si.
