Mi theih tuk lo mi “We Are The World” hla cangsuak dan

Atufang internet cahmai ih lar ciamco Chinlung Chuak Artist cover mi “We Are The World” hla cu lawmh a hlawh zet ih, an thlah nak ni 20 rei fangah 1 million luan zoh a hlawh zo.

“We Are The World” hla cu Michael Jackson le Lionel Richie phuahmi a si ih, hih hla a rak cangsuak dan cu hitin a si.

1983 ah Ethiopia ram ah paampi a tlung ih kum 3 sungah harsatnak, damlonak le rawl-ei-ding nei lo ah minung 1.2 million hrawng an thi.

Nuntukhawsaknak hrang ruatin Inn le Lo suahsantu (internally displaced) mipum 2.5 million an um ih, rampi suahsantu (refugees) mipum 400,000 um in hngakṭah nauhak 200,000 hrawng an um.

Cupawl bawm nak dingah Hla sak/phuah thiam Bob Geldof le Midge Ure in 1984 kum ah “Do They Know It`s Christmas” timi hla an phuah ih hlasakthiam U2, Sting, Duran Duran, George Michael tipawl telin Britist le Irish ram hlasakthiam 37 pawl an sak khawmter. Cumi group cu “Band Aid” tiah hmin an pe ih hlawhtlingnak maksak an hmu.

Band Aid in 1984 December ah “Do They Know It`s Christmas” hla an suah hnu reilote ah Musician le social activist a si mi Harry Belafonte in American hlasakthiam pawl in ziangmawcin Ethiopia miharsa bawmnak an tuah thei ve ding ti zumnak a nei ruangah Fundraiser/Tv producer Ken Kragen sawm in hlasakthiam tampi biak in hla phuah tuding ah Michael Jackson le Lionel Richie rem an ruat.

Cuih hmalaknak cu United Support of Artists for Africa (USA for Africa) tiah hmin bun a si ih, tui ni tiang a uai thei lo mi “We are the World” timi hla a cangsuak mi a si.

Recording netnak hi January 28, 1985 ah A&M Recording Studios, Hollywood ah tuah a si ih hla tlangzarhnak cu 1985, March 7 ah an nei a si.

“We Are the World” tlangzarh hnu, thla 4 sungah USA for Africa in $ 10.8 million (tulai $27 million) hrawng sumsaw an lak lut cih. Cumi Ethiopia harsa bawmnak ding cu mipi thoh mi le a dangdang sumlut neuhneuh a tel nan a tamsawn cu US ramsung hla an zuar nak ihsi ngahmi sumsaw pawl an si.

R&B singles chart, Hot Adult Contemporary Tracks chart, Billboard Hot 100 tipawl ah top 1 dinhmun in caan ziangmawzat a um ih Grammy Awards, MTV Video Music Awards, People’s Choise awards tipawl telin pawlkom dangdang hnen ihsin laksawng tampi an dong.

US ramsung lawng siloin leitluanhuap ah a lar ih, miharsa bawmnak, siattong rampi tundinsalnak tvk hrangah fund hawl nakah sak duh san thawn milaw dingin hlafang an rem ih mitampi in an sak sawng vivo ih kan nih Chin le Mizo pawl tiangin kan run sak ve leh hi a si.

“We Are The World” fun fact ……

***Hla an thlah hmaisabik ah video intro tuahtu Jane Fonda in singer 45 an tel a ti nan a tak ah cu 43 lawng an si. Record an tuah lai ah hla fing thu ah elawknak a um ih country singer Waylon Jennings in a ban san. Hlasakthiam mithizo Prince khal sawmtel a si nan record netabik zaan ah innsung lut duh lo in a kir sal.

***Mihminthang tampi umkhawm in hnaṭuan tlang ding an si ruangah hmuhtonnak neizotu “Do They Know It`s Christmas” tawlreltu Bob Geldof cu hruaitu pakhat dinhmun ah telhve a si ih amah in thil ziangmawcin a tawlrel.

***Hlasak tuding pawl mah tawk ih hminthang cio an si ruangah uangawknak lungput an nei ding ti theih cia a si ih, curuangah buainak le engteiawknak um lo ding beisei in A&M Recording Studios sangka luhnak ah “Puarthaunak le na lungput hinah hlit ta aw (Leave your ego at the door)” timi catluan a tar.

***Mithizo hlasakthiam Prince in cuih catar a hmu veten lungawilo in a kir sal tiah thutheitu pawl relmi cu thuanthu ah ngankhum a si nan a sungkhat naivai pawl cun “a bodyguard thawngtlak khul dingin a feh ruangah a tel lo mi a si” an ti ve thung. Asinan, Prince thuanthu ngan mi pawl ah a duhawk zia le a ngol hmang timi hmuh ding a um.

***American Music Awards pek zaan ah mi kim lai fangah ti`n a zaanzaan rorin netabiknak record an tuah.

***We are the World Tv version hi an suah hmaisabik ah minute 53 a sau ih thehlarnak an telh mi pawl thawn nazi 1 hnakin a sau deuh.

***Chorus ih
“There’s a choice we’re making
We’re saving our own lives”

timi cu …..

“There’s a chance we’re taking,
we’re taking our own lives” … ti`n phuah lawk mi a si nan “suicide” ti duh san a bang ruangah recording an lut hmasabik, January 22, 1985 ah hlafang an thleng danglam sal mi a si.

CHINLUNG CHUAK ARTIST sakmi “We Are The World”

CHINLUNG CHUAK ARTIST ih “We Are The World” cover cu Februry 2, 2023 ah tlangzarh a si ih atu ca kan ngan tiangah voi 1,060,741 an zoh zo.

Tawlreltu (Organizing Team) cu Dadeo Cer, Cz Ralte, Rosie Bawitha Par tipawl an si ih ChinTube timi hmin thawn Youtube ah tlangzarhmi a si.

Tumtahbik cu kan thisenzom Mizo le Chin mi kutzakai tlang in kan pehzomawnak hngetkhoh tersin ding le leitlun mipi in Kawlram buainak an ngaihsak theinak dingah a si ih tumtahmi hluhsuah rero a si zo.

Leitlunhuap Youtuber tamzet in reaction an pe rero zo ih a ra lai ding mi tikcucaan khalah a ngaihsaktu an pung vivo ding zum a si.

Hih hla tarlang nakah kan dung ralhraang ralkap siatsuahmi Camp Victoria siizung tundinsalnak hrang sumsaw a hlu cohlangnak link tarlangcih a si ih, tumtahmi AUD $200,000 a si. Atu ca kan ngan tiangah a hlu $5,148 an dong zo a si.

CHINLUNG CHUAK ARTIST cover “We are The World” hlasaktu cu “Amtea, Atea PB (Boomarang), Benjamin Lianpi, Benjamin Sum (Guys From Chin), Betty Mang Hlei Tial, Biak Hlei Par, David Lai (Guys From Chin), Elena Hniang Tha Par, Emily Ngun Hlei Sung, G’nie, Henry Varte, Honey Khuaitizu, Jenevy Sui, Lian Lian, Liandingpuii, P Thawngbawi (Guys From Chin), Rebecca Lallawmsangi, Rema (To Coda), Sangtei Khuptong, Shinbia, Van Hlei Sung, Vari Varte, Yellow Muzik, Zoramchhani, Zorema Khiangte le To Coda Band tipawl an si.

Zohṭhimmi : Wiki, IMDB, Forbes, Times