CNA/F ralkap in Falam khuasung ngelcel ah Palik an kap nak san …

January 18, Falam nauhak Tlawng ṭum lai kahawknak a um mi thu thawn pehpar in internet cahmai ah ṭongkam phuutawknak hmuh ding a tam zet ih, Ralhraang ralkap do an ṭul lai ah khat le khat/mah le mah doawknak tivek tiang a thleng pang ding phan a um zet.

Mah le mah doawk hi atlangpin mipi duh mi a si lo nan thil um dan le thu um dan zir in hrial theih lo, a tak ih cangsuak thei a si ih cangvaihnak siseh, kan ṭongkam tiang kan ralring a ṭul ti cu kan thei cio thluh.

Curuangah, mah le mah remdaihnak duhtu dinhmun in hih thilcang thawn pehpar mi ah hmuh dan kan run tarlang ding.

1. January 10 le 11 ah CNA/F Headquarter a si mi camp Victoria cu ralhraang ralkap in raldo vanzam thawn bomb an thlak ih mi 5 thi in inn le Lo, thilri ziangmawzat a siat.

Cumi lehrulnak le thinlung lam raldonak tuah phah in, ziang vek cin tiang in siatsuah khal le dung kan siip lo ding. Kan hram bun nak lawng ah kan ralkap an um lo. Hmun dangdang khalah an um, ziang tik lai khalah cangvai thei kan si timi kha ralhraang ralkap hnen ah theihter an duh a si thei.

Curuangah meithal hmang mi par ih CNA timi hminsinnak cangan kha thup hran cuang loin Falam khuasung ah palik an kap. January 18, Falam nauhak Tlawng ṭum lai ah an kap ih a hmun ih um pawl in meithal par ah CNA tin ngan mi kan hmu tiah media hnen ah an sim.

Cun, miṭhenkhat cun Falam khuapi buaiter duh le Thantlang khuapi vekin Falam urkaang thluh an duh ruangah khuasung cangvainak an tuah hrim mi a si thei tiah an rel nan, cuti ding cun meithal par ih ngan mi CNA timi kha an ti lang ding zum a um lo.

Cumi an duh ceng a si cun tualsung hram bun hriamkai pawl kha mawh phurhter dingin an cangvai ding ih mipi-ralhraang-tualsungum hriam kai pawl karlak ah thubuai um dingin an cangvai ding tiah ruat theih a si.

A hrimhrim in khua pumhlum rori siat thluh dinhmun a thlen tla cun kan Chin mi zate`n kan tuar thluh. Bawmawknak ah ramleng ihsin fund hawl sak awk a si tlangpi ih an mah mipi ralkap ṭanpitnak kha timal in khuatlang mipi a hranten bawm an ṭul ding. Cuti a si cun mipi ralkap tha mal nakah a cang phah ding tikah ziangmawcin harsatnak an nei phah ve thei.

2. Ziang ruangah Falam khuasung ngelcel an bat?

Zovek hriam kai an si khalah mai` ham ṭhat nak ding boruak hai thluh cio a si tlangpi ih a ṭhen in langhngan in an tuah. A ṭhen in mi theih lo ten an tuah. Cumi cu a dik lo an ti hman ah hmalaknak an nei mi siseh dundan an fehpi dan pawl lenglam ihsin rak thlir ahcun cuvek deuh zawng thotho in a lang thluh.

Hmui tin mi bangaw khal ah Hriamkai ciocio ah zo kan cal cang sawn, ziangtluk in hmuhtonmi kan nei zo, zingvek cangvaihnak pawl kan rak nei zo, mipi in ziangvekin in zoh mi kan si, Ziangvekin huham kan nei ih ziangvekin kan cangvai thei timi kha thinlungten zuamaw ringring a si.

Cuti a si tikah kan dung bai CJDC sung ihsin cawl la lawk tu Falam hram bun Chin ralkap kha ziangvek cin tiang kan cangvai thei ti an theiter duh. Nan hnakin cal cang kan si ih a ṭul cun kan ram ri tiih ri nan khiah mi sung khalah ralhraang kan do thei ti kha an langter. Hriamkai ciocio lakah politic khel phah in thinlunglam zuamawknak tuah phah, ralhraang do phah ti`n cangvaihnak an nei mi a si thei.

Tlunlam ih tarlangmi pahnih hi leitlunhuap ram dangdang ih Revolution tuah, Hriamkai pawl mah le mah karlak politic khel nak ih an hman tlangpi dan a si ih, cumi vekin CNA/F in a tuah ve mi a si thei.

Amah belte nauhak Tlawng ṭum lai kher ih cangvaihnak an tuah mi cu duh um lo lawlaw mi a si ih UN pi siseh Human Rights lampang zawng thawn khal milawmi a si lo.

Cun kahawknak ruangih hriam tuar Tlawngta nauhak siseh, kahawknak ruangih a rung cang betmi kaihkhih awknak thawn pehpar in ngaidam dilawknak lole simfiahawknak tuah tengteng thei sehla mipi lung a ti thiang deuh ding.

Atu Falam khuasung kahawknak ih mipi thinhennakbik khal hi nauhak Tlawngṭumlai kahawknak le cumi hnu ih thilcang um bet mi pawl ruangah a si bik ih mipi duhlomi hriamkai nan si cun mipi mit ah ralhraang ralkap thawn dangawknak a um lo ding.

Cun, thinlungtak a si lo hman ah a hmin tal in khat le khat upat awton thei seh la mah le mah karlak ah remdaihnak a um thei ding.

Hminsin : 1. Kan theih dingmi ah ralkapbu siseh pawlkom zawng khalin thil khungkhai an tuah dingmi, khawkhannak an nei mi, tuah duh nak san cipciar tivek cu mipi hnen ah ziangtik hman ah thu zaten Tlang an than dah lo ding. A sung muril lang thluhter lo in mipi cohlan thei dan ding thawn naiawk bikin thu an rel ding.

Cumicu mizapi theih cia mi a va si nan cuvek theihterawknak lole a thilthlam simfiahnak kan tuah mi hin mipi thinlung a ti diriam a si.

Hminsin : 2. Falam khuasung kahawknak thu lawng thlir in ngan mi a si.

Opinion : Chinram Duhdawttu

(Cangantu hmuh dan liolio a si.)

Leave a Reply

Your email address will not be published.