ZRA lamṭang pawl in Mizo kan unau hnen ah zualko

CNF le ZRA an kap aw mi thu thawn pehparin Zomi Revolutionary Army lamṭang (sungtel khal an si thei?) ṭhenkhat in tumtah neiin a thu zawngin Mizo kan unau hnenah zual an ko a si.

December 17 ah Chinram hriamkaibu CNF le ZRA cu Tedim thawn peng 20 hrawng hlatnak, Ngawsing khua kiang ah an kapaw ih, doawknak ah khuami telin hriam tuar ṭhenkhat an um.

Tuṭum doawknak hi santhar Chinram thuanthu ih, ramkulhsung um ciocio mah le mah doawknak a suak ṭumkhatnak a si bangin Chinmi lakah rel a hlawh zet.

Internet cahmai comment nak pawl ah ZRA mawhpuhnak hmuh ding a tam nan, ZRA lamṭangin khatlam mawhpuhtu hnih-thum an rak um ve.

ZRA, Zomi, Mizo tiah hashtag tuahin CNF/CDF/PDF demnak ca thlahtu khal an um ih mipakhat phei cun mipum member ting 3 le hrek luan umnak Mizo Special Report FB group ah a thu zawngin zualkonak ca a thlah a si.

Amahcun “17 December 2021 zinglam ah Gawsing khua ih Zomi ralkap pawl riahnak cu Chin ralkap CNA mipum 40 hrawngin an rak kap ih khuami 2 hliam an tuar. Tuhlanpi ihsin Zomi area (Zogam) ah Chin ralkap pawl in buainak menlomi voitamzet an tuah ṭheu.”

“Sumdawng pawl hnen ah siah an khawng ṭheu hlei ah khawuktu ṭhenkhat khal an rak that zo. An mi thatmi lakah, Mizomi, Khuangleng YMA hruaitu Pu C.Lalhmangaiha khal a tel a si. Tukhalah Haimual khuaah lutin miziangmawzet an kai tiah theih a si. Zomi mipi hin Chin ralkap pawl hi kan ning thluahthlo zo. Zomi area (Zogam) sungah ra cangvai nawnlo dingin dilngennak kan nei a si” tiah, tumtahnei le Mizo kan unau ṭanpitnak beisei nei zet mi bangin ca a thlah a si.

Hivekin Dothlengnak ah langhngan rori`h teltu Chin ralkap pawl an dem nan, Doawknak thuthawn pehparin CNA ṭuanvonei Salai HtetNi cun hitin simfiangnak a nei ve.

“Ralhraang SAC ralkap pawl thawn tongawknak an nei tiah thuthang kan dong ih an cangvai man hlan ah kan mah in kan va kap hmaisa mi a si” tiah CNA ṭuanvonei Salai HtetNi cun a ti.

ZRA cu PDF/CDF sakhaan hmun 3 lai siatsuahzotu hriamkaibu an si tiah theih a si ih, Chin ralkap pawl in cuvek cangvaihnak an nei bet cun kan kap leet ding tiah ralrinpeknak ca an rak suah dah zo a si.

Tuṭum ZRA an do nakah CNF thawn ṭangrualin CDF-Hualngo pawl khal an telve tiah theih a si.

Leave a Reply

Your email address will not be published. Required fields are marked *