ZHP in CDF Zanniatram a theih pi lo cu thil ṭha rori a si – Mipi Auaw

Zanniatram le mipi kilhim tuding Chinland Defense Force – Zanniatram an din thu cu March 21 ah a dintu thawn pehparmi FB cahmai hmangin mipi an sim thei.

Cuih thuthawn pehparin tualsungum Zanniat tlangtlaun khua 49 komkhawm ih dinmi Zanniatram Humhim Pawlkom (ZHP) in, an theihpi lo thu le Dem nak ca cu March 28 ni khen in an suah.

Zanniatram Humhim Pawlkom Thusuah 1
Zanniatram Humhim Pawlkom Thusuah 2

Dothlennak an tuah rero lai ah miphun zawngin maitnak hawl tum ih dinmi CDF – Zanniatram an din cu raihsiaza a si ih, cupawl cu kan nih Zanniatram Humhim Pawlkom in kan dem a si tiah ZHP cun thu an suah ih, an thusuah cu Falam peng hrangah thil ṭha a si tiah tualsungum upa pakhat cun a rel.

“Tuhlan khalah Phunhnam hmin pu in kan peng sungah hriamkaibu dintu an rak um dah. Cumi khalcu nasaten buaipi a rak si ih, atu ah a hmin in pawlkom dang pakhat a suak lala.”

“Nan, cumicu tualsungum khua 50 kim zik huap ih dinmi pawlkompi in an theih pi lo thu an suah ih, cucu thil ṭha a si.”

“Ziangah kan ti a si le pengkhat sungih hriamkai pawlkom dangdang a um mi pawl kan zoh tikah buainak nasazet a suakter ti kan hmu thei.”

“Ṭahṭhim nakah kan unau Mara pawl ih hmuhtonmi kha pawlkom dangdang an um ruangah a cang mi a si ih, nunnak liam tiang an um phah”.

Chinland Defense Force – Zanniatram an din suak

“Kawlrawn khalah Yinmarpin PDF dangdang an um ih tiaw thiam loin PDF le khawmi 10 rori an nunnak a liam phah. NUG rori in March 26 ah thu an suah ih “Yinmarpin PDF a si mi ဗိုလ်သံမဏိအဖွဲ့ sungtel pawl cun khat le khat hmuaw thiamlonak ruangah pawlkomdang PDF ralkap le Khawmi 10 an that” ti`n thu an suah.”

“Curuangah kan peng sungah hriamkai pawlkom dangdang a um pang cun cuvek dinhmun kan thleng lo ding ti sim a theih lo. Curuangah ZHP in Chinland Defense Force – Zanniatram an din mi an pom lo thu le an ram pawl ah cangvai kan siang lo ding an ti mi cu thil ṭha rori a si. Kan unau Zanniat upa hruaitu pawl ih thuruat thiam dan cu porh tlak rori an si” tiah a ti.

CDF-Zanniatram dintu hi zo pawl an si timi theih ciang a si lo nan, thusuahmi ih ngan tel mi General Secretary phone number cu (+91) India phone code a si. Thu an theh darh nak FB cahmai admin cu Canada ihsin 2, US ihsin 1, Myanmar ihsin 1 tipawl an si ih Online lawngih an din hrih mi pawlkom si in a lang.

CDF – Zanniatram an din thu ah “Thu dik Fel Fai”

Screenshot-2022-01-29-175659

Leave a Reply

Your email address will not be published. Required fields are marked *