US ih um Chin raltlan lakih Stanford University kai hmasabik tuding Mai Biak Ṭha Hlawn
Duhtapiang ih kai theih lomi Leitlun University ṭhabik 5 lakih telbanve Stanford University ah US ih um Chin nu full scholarship a ngah tiah theih a si.
Pu Lian Kulh Cung(Farawn, Thantlang) le Pi Par Iang Hnem(Thantlang) tei` fanu Mai Biak Ṭha Hlawn cu May thla sungah Ronald Reagan High School, Milwaukee ihsin a ṭhehsuak dingih Stanford University ah a kai pehzom leh ding.
A thuhla an ngan mi ah, amah hi Highschool a kainak ah cathiam langsar zohṭhimtlak nunnei tiih upat hlawh a siih tlawng a kai nakah siseh, inn lam, biaknak lam le community lam khalah pumpeaw zettu a si.
A nauhak lai in US ram an thleng ih tlawng a kai pek ahcun mirang ṭong khal ṭhiṭha in a thiam lo.
Tuhlan kum 11 luan zo ah harsatnak phunphun ruangah suahsemnak Chinram suahsan in Malaysia ah raltlan dinhmun ih lut an si. Malaysia ah kum 2 an khawsa hnu ah US ram ah an vai leh sal.
US ram ih tlawng a kai pek ah mirang ṭong ṭhitha thiam lo a si nan zuamnak le tumruhnak a nei mi hin a hmakhua a ti ong ih, tu ah, US ram um Chin raltlan lakih Stanford University kai thei hmaisabik dinhmun in Tlawng a kai peh ding a si.
MPS in the News: @tmj4 – Reagan High student, Hlawn Biak is the first Hakha-Chin refugee to attend @Stanford University. #MPSProud
Watch the full story at @TMJ4 – https://t.co/WnBRFUMUuZ
— Milwaukee MPS (@MilwaukeeMPS) May 7, 2021
Stanford University hi paisa nei tapiang ih kai theihnak Tlawng a si lo. Highschool kai lai ihsin micuangce cathiam hleice si a ṭul ih Wikipedia ih ngan mivek asile Stanford University ih tlawng kai dil ding cun Grade Point Average 3.96 si a ṭul.
Kum 1 ah Tlawng kai diltu minung 50,000 an kim zik ṭheu ih cumi lakah minung 2000 hrawng lawng an hril ṭheu. Kum 1 ah dollar $70000-90000 hrawng cemliam a si ṭheu.
Chin mino le ka kiangkap um pawl thinlung thotertu si ka duh. Kei mah vek dinhmun a si nan tuvek dinhmun ah a thleng thei ti`n mi ih zohṭhim/Lungthotertu si ka duh ih si thei dingin ka zuam vivo ding …. Mai Biak Ṭha Hlawn
