Tuni June 29 hi CNO/CNDF le Chin mipi hrang Thimzing a tlung ni, kumkhat kim nipi a si

Tusun hi Falam peng Locom kiang doawknak kumkhat kim ni a si

One Year Memorial Day
(29 June 2021 – 29 June 2022)
by Olivia Thawng Luai

CNO/CNDF nih kawlralhrang a do mi lak ah paralṭha an thi tam bik ni le, mipiralkap hriamhma na sa zet an tuar tam bik ni khal a si. Kan hrang ah cun thimkhawzing a tlung ni khal a rak si.

Ram le miphun hrang ah paralṭha panga an nunnak an hlan ih, pakua in hriamhma na sa zet an tuar ni khal a si.

Nunnak liam tu mi panga pawl cu (1) Salai Naing Aung, (2) Salai Tial Hup, (3) Salai Kyaw San Win, (4) Salai Van Bawi, (5) Salai Thawng Zel tla an si. Hriamhma tuar pawl sung in mi pahnih cu an mitkhua hmu nawn lo in thim lak ih an um nak kumkhat a kim ni a si.

Pakhat cu kutke ṭha ten a cang thei nawn lo, pakhat cu a kut an tan sak, ke thahircat le ruh kiak ruang ah ṭha te’n feh thei nawn lo…. tivek in leitlun ah harnak phun kim an tuar rero a si.

Kan nih in dothlengnak ah kan ti thei tawk in ṭan kan la kan ti nan, a caan caan ah cun minung kan si vek in…. Mipi hrekkhat in ralkap cozah on mi tlawng ah an fa le pawl tlawng an kai ter caan ah, nuntudan pangai hmangin an nuam rero men kan hmuh caan ah, CDM paih lo le tuah thei lo hman ah nuam aw in zuk an tar, hnaṭuan an khaisang mi pawl kan theih caan ah…

“kanmah lawng maw kawlralkap uknak duhlo in zonzai ra tuar rero…!!” ti hi ka ruat ṭheu. “A cang thei tawk in ṭan kan la kan ti lai ah soiselin in puhmawh hrih lai .. a dik lo tuk”… ti vek pawl in, thinheng, dungsip duh thinnau caan tla a um ṭheu.

Sihmanseh, kandungkum tusun ni vek ih kan rak tuar mi le, khami sun lo, nidang, hmundang ih Dothlengnak ruang i nunnak a hlan tu, hriamhma tuar in mibang thei nawn lo tu kan Chinralkap pawl tuar nak hi a lak in si hram hlah seh.
Kan dungkum tusun vek ah kan ṭap, kan tuar, kan thla a phaang zet mi khal a lak in si hram hlah seh ti ah thla ka cam.

A liam cia kan paralṭha pawl khal in nehnak kan co hi an duh zet ding si khawh… Cung Pathian nih kan mipiralkap pawl humhim hram seh.

Nehnak thanthar kan zar tiang a harsa bul, nuam aw bul ti umlo in, mipi thawn kan ti thei nak cio ah ṭangrual ding in, in funtuam hram seh.

A ṭuan tu pawl khal harsatnak phunphun, soiselnak phunphun, mawhpuhnak pawl cu tong hman seh… ol te’n dung sip lo in lungfeknak, fimthiamnak le rinumnak thlasuah pe hram seh.

Kan ram le miphun tla Pathian nih thlasuah pe hram seh.

Mai Olivia YH TL
29/06/2022

Leave a Reply

Your email address will not be published. Required fields are marked *