Tumnak rak nei cia hran loin Aizawl ah Hope Charity Concert an tuah tum

US hrambun, Chin mipi bawmtu ‘Hope For Tomorrow’ hohanak thawn Kawlram raltlan pawl bawmnak dingah Charity Concert tuah tum a si ih cumi hrang timlamnak an nei rero tiah theih a si.

Aralai dingmi April 30, 2022 zaan nazi 7 ihsin Aizawl, Vanapa Hall ah tuah ding a si ih, atufang Chin milar Shin Bia telin hlasakthiam tampi an sawm.

Kawlram raltlan hrang Charity Concert cu tuhlan ihsin rak tuah tummi a si hran lo. Chin ralkap le Mizoram ih raltlan pawl vehvaitu Hope For Tomorrow Founder Justin Thang le hlasakthiam Shin Bia in raltlan pawl an vehvainak ih bawm an áš­ul zia an hmusuak ruangah tumnak rak nei cia hran loin raltlan hrang Charity Concert an tuah tummi a si.

Hope For Tomorrow dintu Justin Thang cun “Mizoram ih raltlan umnak camp 5 hrawng kan feh ngah ih thinlung a tham duh zet.”

“Hlaral ih kan rak theih mi le atak ih kan ton mi a dangawk nasa. An harsat zia kan hmu mi hin kan thinlung in tham zetih kan tlung hnu ah teh tuhlan vekih kan um keelten kan um san ngam ding maw? titiangin thu in ruat ter. Raltlan pawl dinhmun cun kan nun in thleng danglam rori a si.”

“Raltlan camp kan riah nakah tlawng kai thei le tlawngkai ding nauhak pawl cu kum 1 – 2 sung tlawng kai thei loin raltlan camp ah an khawsa mi kan hmu. An nu le pa pawl thawn feet 10 kau nak hmunbite ah mi 7-8 an um tlang.”

“Cuvek pawl kan hmu tikah ton men in tlungsan men a theih lo zia kan theifiang ih, an hrang ah caan malte lak sak in Aizawl, Vanapa hall ah Hope Charity Concert timi hmin thawn sum hawl sak phah in le kan ton teh mi pawl sim phah a si ding” tiah a ti.

Hope Charity Concert cu zoh/luh man um lo, mah le thei tawk bawmnak pe dingih tawlrelmi a si ih, a hmun ih feh theilo pawl khal online ihsin bawm nak pe thei dingin sangka onsak an si.

Leave a Reply

Your email address will not be published. Required fields are marked *