Tufang hi, Ralhraang ralkap in Chuncung khua an Urkaang rero lai fang a si

Mizaan, July 14 ihsin Urkaang thok mi Chuncung khua cu inn 15 hrawng a kaang zo ti a si ih, atufang khal hi ralhraang ralkap in inn an urkaang rero lai tiah khawmi pawl in an sim.

Internet cahmai ah hmunhla ihsin zuk mi Chuncung khua a kaang lai video tawi thlah darh a si ih, video sung lang dan ah amalbik hmun 3 tal a kaang zo si in a lang.

CDF-Hakha ṭuanvonei mipakhat in “hmun 3 hrawng ah inn an khaang. Inn 15 hrawng a kaang zo ti`n thu kan thei. Doawknak a um ih, atu khal hi inn kaang rero lai. Ralhraang ralkap pawl khal khawsung ah an um lai” tiah a ti.

Mizaan July 14 ah Chuncung thlenhlan ah Chin ralkap ṭangkop pawl le ralhraang ralkap an do aw ih, zaan thim hrawngah ralhraang ralkap pawl Chuncung khua ah an lut thei.

An thlen veten inn an urkaang tiah theih a si ih mizaan ah inn 3-4 hrawng kaangin, tuni an khaang betmi thawn inn 15 lenglo a kaang zo tiah thuthang kan thei.

Siarbet : Falam-Hakha zinpi doawknak ah Paralṭha Chin ralkap pakhat in ram le miphun hrang nunnak a hlan

Mizaan, July 14, Falam-Hakha zinpi doawknak ah Paralṭha Chin ralkap Salai Biak Hnin in ram le miphun hrang nunnak a hlan.

Amah hi CDF-Hakha ralkap si in, Dokthek le Chuncung karlak doawknak ah a nunnak a liam ih, a ralkappi pawl in a ruak an lak thei zo tiah thuthang kan thei.

Kan dung, July 7 khalah CDF Hakha ralkap a si mi Salai Roland Kil Kam Thang, kum 20 le Salai Daniel, kum 18, in ram le miphun hrangah ralhraang do phah in an nunnak an hlan.

Ral do nak hmun cu tarlang a si lo ih, ram le miphun hrang nunnak an hlan mi par ah CDF-Hakha in asangbik upatnak pekin July 15 ah sunnak capi an suah a si.

Leave a Reply

Your email address will not be published. Required fields are marked *