Thantlang khuasung doawknak ah Ralhraang SAC ralkap 7 thi

Thantlang ih ni 3 sung doawknak ah ralhraang SAC ralkap 7 an thi ih, inn 90 luan a kaang.

January 30 zinglam nazi 11 hrawngin an kapaw thok. Nazi 2 sung hrawng kapawknak ah SAC ralhraang 1 a thi ih ralhraang lam khalin inn 18 an urkaang tiah CDF ṭuanvonei mipakhat in a rel ih “an lam mithi an um ruangah hngirṭeuin inn an urkaang tiah kan ruat” a ti.

January 31 khalah kapawknak a suak saal ih ralhraang lam mithi 1 an um thu le ralhraang in zaanlam hnu ah TABC veng ih inn 76 an urkaang thu, amahcun a rel bet hrih.

“February 1 khalah sunvu deuh thaw kan kapaw. Ralhraang SAC ralkap in phukpi voi 50 hrawng an kap. Nan, kan lam ah hriam tuar pakhat hman kan um lo. Khawsung inn pakhat cu a kaang. An lam ah mithi 5 hrawng an um” tiah CDF ṭuanvonei mipakhat cun a rel.

Mipum 10000 hrawng khawsanak Thantlang khawlipi ah innkhi 2000 hrawng a um ih, Boruak a sosang hnu, 2021, September thlalai hrawngin 2022 February thla thok tiangah ralhraang kutin khawsung inn 900 luan a kaang zo a si.

Leave a Reply

Your email address will not be published. Required fields are marked *