SAC Ralhraang kut tuar in Chin pacangṭha mual liam

Mawh nei lo, Lo thlo men Pu Biak Nei Sang cu ralhraang SAC ralkap pawl in hngawng at sakin rapthlaak zetin an that.

Amahhi Kalay peng, Cicai khawmi a si ih November 14 ah Celreng cing in, Lo ah a riak. Ralhraang SAC ralkap pawl in Kalay-PDF sakhaan siim dingih an feh lai ah lamlak ah an kai ih a hngawng an hlep tiah theih a si.

Khuami pawl rel dan ah Pu Biak Nei Sang hin Lo feh nakah Phone, Radio le namte tivek a keng ih, a nupi thawn an biakaw netabik cu November 15 zing ah si.

“Zingpit ah a nupi thawn an phone aw ih Purawng ka lak hnu nazi 7 hrawng ah ka ra tlung ding a ti. Nan, tlun ti nei loin sunnihlawh phone an biak thei lo. A thaizing an phone saal ah voihnih a lut nan phone an phit lohli saal. Cumi in a sungte pawl khuaruahhar vansang in an um” tiah khuami pakhat cun a rel.

Thi cia ih a ruak an sar ahcun buut hri thawn a kut ṭonaw in a rak um, cun, a phone le namte tivek a um nawn lo tiah amahcun a sim bet hrih.

Kum 40 mi Pu Biak Nei Sang cu November 15 ah ralhraang SAC ralkap kut tuar in a nunnak a cem tiah theih a si ih, a ruak cu November 19 ah PDF-Kalay sakhaan kiangah khuami pawl in an va phur tiah theih a si.

Pu Biak Nei Sang hin a duhdawtmi a nupi le fanau 4 a liam san a si.

(+ input from Zalen)

Leave a Reply

Your email address will not be published. Required fields are marked *