SAC ralhraang cun Mindat PDF hnen ih a tiamkammi pahbal cih

Mindat Khuanu/pa palai ah hmangin SAC ralhraang le CDF Mindat karlak ah ni 14 sung kapawlo dingin June 20 ah ruahremnak an nei fel zo nan ralhraang lam cun thutiam an pahbal cih.

Harsatnak phunphun tuarin hramlak ih beutu Midat mipi kir sal thei dingin kaphnih lungkimnak an tuah mi a si ih June 20 ihsin July 4 tiang kahdonak cawl lawk dingin ralhraang lam khalin an lungkim.

Hih thu thawn pehpar in Mindat Khuanu/pa hruaitu pakhat cun “Thlaphannak umloten zalen zetin khuasung ih mahle umnak cio ngaihven thei dingin hramlak ih beutu Mindat mipi pawl hrangah lamziin kan sial sak mi a si.”

“Khuasung lutsaltu pawl cu ralrin nakah ti`n meithal, puakkuai thei thilri an keng le kenglo ceknak cu a um ding. SAC ralhraang in an cek ding nan kaihkhihawknak umlo dingin thu kan rel tlang” a ti.

Camkhat hrang kaphnih rualremnak cu an tuah nan SAC ralhraang cun tuini June 23 ihsin thok, Magway lam le Mindat lut/suaknak pawl ah duty in mawṭaw sukso hmuahhmuah cu nasaten an cek sak tiah theih a si.

Khuami pakhat cun “Mindat CDF aiawh in khuanu/pa le SAC ralhraang biakremnak an neiaw nan khuasung ih phurlut dingmi Fang, Siivai tivek phurtu mawṭaw ṭhenkhat cu an lut siang lo.”

“Cun, kum 50 luan upa pawl cu duhtawkin khuasung an lut-suak thei nan pacangno le mino pawl lut ding cun an khoh remrem. Khuasung lutsun mino pawl khal an suak siang nawn lo tiah kan thei. Asinan, mitamsawn cu SAC ralhraang an rin theilo ruangah an ra kir duh lo” a ti.

SAC ralhraang hi Mindat CDF khalin za ah za an rin ngam lo nan nikhua sia le nat phunphun lakih beutu Mindat mipi ruatin mit sing phah cingin SAC ralhraang an dawr hi a si.

Edit : June 23, Mindat CDF le SAC ralhraang karlak ah rualremnak dang 5 an nei bet…..

Leave a Reply

Your email address will not be published. Required fields are marked *