Ralkian dinhmun in na theih tengteng ṭulmi Thil Thupi Phun 6

Atufang, Saklam Chinram boruak cu kan thei cio bangin a himlo zetih, abikin, June thlacem, July thlathok hrawngah Falam peng ah ralhraang cangvaihnak hmuh ding a tam.

Tubaite khalah Webula le zanniat mual ih khua ṭhenkhat ah ralhraang an lut ih hmunram nor vivo an tum ruangah CNDF le SAC ralhraang lakah kahdonak a suak zo.

Doawknak a suak lo khalah hriamhrei ralthuam rinsan in rampihuap hmun tinkim ah mai` duhduh dan ih nungtu SAC ralhraang umnak tapiang cu a him lo tiah ruah a si ih, Falam peng khalah ralhraang khuasung lut ruangih Inn le Lo suahsan in hramlak ih beunak hawltu an tam.

Khua dang khalah cuvek dinhmun thleng leh thei kan si ih ralkian dinhmun in hramlak ih beunak kan hawl tikah theihṭulmi tamzet a um.

Curuangah mipi hrang ṭhathnemnak a um pangah ti`n ralkian dinhmun in hmuhtonnak neizotu miṭhenkhat cu FOM in thusutnak kan nei ih an mah pawl cun a tanglam bangtuk in an rel a si.

1. Pacang, Mino tamzet cu ralhraang do dingin meithal kai duh an tam nan kum upa, Nunau le nauhak pawl hmun him ih hruaituding mipahnih-thum tal ruatawk cia a ṭul. Cukhalcu hmunram theiciangtu rori ruat ṭha in an mah kaihruaiter ding.

2. UNHCR casuahmi ah Kawlram ralkian tamzet cu humhimawknak hrang siseh, hramlak ih ṭul poimawhmi thilri tlasam an tam ih harsatnak an tong ti a si. Cumicu rinlopin Inn le Lo suahsantu ralkian pawl dinhmun an sim duh mi khal a si thei.

Nan, kan nih khal cuvek dinhmun thleng leh thei kan si ih innsang mipum umdan zirin hmailam ih kan ṭul dingmi thil tete ret cia thei hi a ṭha bik.(ei-inro, boruak thawn zirin hnipuan, sinpuan, Lamsialnak le thil dang ṭulpoimawh hrang ih hman theihmi naamte … tvk). Cutin kan tuah a si le rinloin buainak a suak tikah mah hrang cio ah a hnazang thlak zet.

3. Ziangtiktiang hramlak ah kan um ṭul ti kan theilo ruangah a kheu olmi thlai cinding khal ken a ṭha. Cumicu thilthupizet a si tiah Kachin,Kayah lam ih ralkian pawl in an rel.

4. Innzuat ṭilva hrangah rawl tampi ret cia lole hruang leng ah tlangter men a ṭha. Cumi cu kan dungbai Webula thilthleng mi`n in zirhmi a si. (Hruang sungih Vok rilrawng suah dingin khua ih a tlung thuptu ralkian pahnih cu ralhraang pawl in an rak kap)

5. Kan pan nak ding hmun pawl mitampi theih ter lo ding. Hruaitu ruat cia mi an um le an mah pawl in an thei cun a tawk ko. Asancu mipi lakah Dalan an um thei.

6. Athupibik pakhat cu Siivai ken hi a si. Hramlak thleng dahlo hrangah damlo a olte ih cuvek dinhmun kan thlen tikah tuamhlawmnak ding Siivai kan ṭul. Hliamhma tuamhlawmnak ding khal kan keng tengteng ṭul. Cun, Rinlopin kan ruat cia mi hmunram remcanglo a um thei. Curuangah umhmun khuar theih nak ding hmunram 2 tal hisap cia thei seh la …………..

Leave a Reply

Your email address will not be published. Required fields are marked *