Rev. Dr. Stephen Hre Kio ih mipi hnen thazaang peknak cakuat ropi

Kawlram sung siseh, ramleng siseh, tulai caan ih kan tuardan cu mangbangza a si ih, thinharnak thawn a khat. Ramsung ramleng Laimi kan zatein Covid 19 ruangah a nami kan tam ih in thihsantu khal an tam.

Kawlram ah Cozah thuneihnak a longtu ralkap pawl in harsatnak tampi ram pumpi sungah an thlenter. Mihrek cu an nunnak a liam, mi hrek cu mai` inn hman ih um ngam loin hramlak ah ruahsur le ciarbek, fikfa le caangvat lakah nan um, nan relh ti kan thei. Ral pahnih kar ah a nungtu kan duhdawtmi pawl nan hrangah kan thin a na hleice.

Laimi tampi Covid 19 in kan thi. Ka theihnak ah Kawlram ah Laimi Pastor le Evangelist 80 hrawngin in thihsan zo ti ka thei. Abikin kan Baptist Kawhhran sungih rinsan bikmi pawl lakih pathum: Falam Baptist Association (FBA) General Secretary Rev. Vai Lian Zul, FBA Vice President Rev. Tlei Thuan, CBANA Chindwin Valley Mission Director Rev. Lian Ci, in thlanmual in liamsan cu a poi hlei ce.Kan thin a na ih kan thla a ṭem.

Leitlun khuazakip ih Laimi pohpoh kan thin a na ih kan riah a sia. A tuarzia kan thiam cio lo. Cule USA ahcun vaccines sii in dawt ih hnangam deuh kan si hmang, kan ti nain Covid natnak a thar (Delta variant) timi a thleng lala. Ziang kan bang ding ti kan thei ngaingai lo. Hi natsiava (pulnat) hi ziangcan a feh hrih ding ti khal kan thei lo.

Hibangtuk caan ahhin khawruahnak a phunphun kan nei ṭheu. Kan sual ruangah Pathian in in hrem a si pei maw? Pathian in hi bangtuk natnak le harsatnak hi a kham thei lo maw? Thla kan cam rero nain damnak le daihnak a um cuang lo, Pathian in kan thlacamnak a thei lo a si pei maw? tipawl thu a phunphun kan ruat.

Saam Hlabu ngantu bangin, “Maw Bawipa, bomnak dil in ka lo ko. Zingtinte na hnenah thla ka cam. Maw Bawipa, ziangah so i hnon? Ziangah so ka hnen ihsin na relh?” kan ti caan a um men ding. Hi bangtuk caan ahhin beidong a olte, Kanmah lakah khat le khat mawhthlukawk khal a olte.

Cubangtuk in thu kan ruat ih thu kan suh tikah, Pathian hmaiah kan mawh, tinak a um lo. Minung daan a si ko. Cubangtuk khuaruattu le thusut theitu kan si hi kan thin a bangtertu a si phah nain, milai kan sunlawinak le ziangdang hnakih kan hleicetnak khal a si ve. Saduhthahmi kan neih ruangah a si ih, famkimnak hmun thleng sehla ti kan hngakhlap ruangah khal a si. Pathian mawhthluk lo ding le Pathian kan huat lo ding kha a thupimi cu a si.

“I duhtu le ka rualpi ṭha bik khal na tlanter ṭheh ih ka rualpi neihsun cu khawthim lawng hi a si” kan ti caan tla um hman sehla, zumtu Khristian cun ruahsannak kan nei ringring ko. Ziangahtile sualnak le Satan, natnak le thihnak nehtu thosal Bawipa Jesuh Khrih, a nungmi Bawi, kan neih ruangah a si. In thihsantu kan unau pawl hi zumtu an si ih an hrangah kan Bawipa Jesuh in hmun ṭha remciami an hrangah a ret ko, ti kan thei fiang.

Nomnak le daihnak hmun, Bawipai` ṭangnem ah an thleng ti khal kan thei fiang fawn. A damlaimi kannih khal hi kan caan a thlen cun an hnenah kan thleng ve ding, ti kan thei fiang fawn. Curuangah kannih Khrih zumtu cu ruahsannak kan nei ih khawvelmi bangin riahsia le lungdong ding kan si lo.

Hibangtuk caan har le mangbangza caan kan thlen ih kan tontehmi hi, kan Bawipa thawn kan fehtlang ahcun, kan hrangah a selam hnakin a ṭhalam ah a cang thei a si. Israelmi pawl kum 40 Izipt ramah sal an si ih tlunah kum 40 sung thlaler ramṭhing ih an vahvaih kha a lak a si lo, ti kan zum.

Josef tla a ule pawl in an zuar ih Izipt ah hnen-um in a um ih thong ih a tlak khal kha a lak a si lo, ti kan thei. Paul tla voi tampi thong a tla ih harsatnak siarcawklo a tong, a dam theilomi natnak khal a nei. Asinan a phunzai lo, “Ka ṭawnṭaih caan hi ka cah laitak a si” a ti. Tuih kan tontehmi natnak le harsatnak ropi caan hi kan lon hnuah cun, dungher ih kan zohsal tikah, Pathian thawn kan naihawk bik caan a si, kan ti leh thei men.

Kawlram natnak le harsatnak nan tuarmi hin deem deuh le luat deuh dingah a phunphun in hilam in kan tawlrel rero. USA cozah siseh, ramdang cozah siseh, bawmtu ṭha si dingah a phunphun in thu in siseh, cakuat siseh, kan tawlrel rero. Nan hrangah Laimi upa tampi in caan tampi le tikcu tampi hmang in an ṭang a si.

Curuangah falenau pawl, thinsau tein le beidonglo tein hmailam feh dingah kan ṭang sinsin cio pei. Pakhat le pakhat thla kan camsakaw cio pei. Natnak lakah ralrin thiam kan zuam cio pei. Ralhraang lakah ruahsannak tumpi thawn nun kan tum sinsin pei. A netnak ih thuneitu cu milai an si lo, Bawipa kan Pathian a si, ti kha hngilh hlah uhsi.

“Leilung tlun hmuahhmuah ih thuṭhentu cun dingthluk lairelnak thawn thu a ṭhen lo ding maw si” tihi kan Baibal ih dinpimi a si. Amai` tikcu caan ah kan thlacamnak hi a kimter leh ko ding. A kim tik ahcun kanmah duh caan ah kim sehla kan timi hnakin a famkim deuh ngaingai sawn leh ding. Kan Pathian in Amah ram kautertu ding le Amai` hmin thantertu ding ih in hrilmi Laimi pawl ih kan tuarmi le kan tontehmi hi a lak cu a si hrimhrim lo ding, tin zumnak thawn ka cakuat ka netter.

Duhdawtnak le nan hrang thlacam phah in,

Rev. Stephen Hre Kio, Ph. D.,
Falam Siangbawi
Indianapolis, IN, USA
July 21, 2021

Leave a Reply

Your email address will not be published. Required fields are marked *