Ralhraang ralkap thawn hnaṭuantlang tummi ṭhulh sal

Khuatlang mipi hlawknak hrangah ti`n ralhraang ralkap cozah hnen ihsin tender ngahtu company pawl cu Mindat peng sungah khuatlang ṭhansonak hrang hnaṭuanter dingin Mindat CDF in lungkimnak thusuah an tuah zo nan, July 21 ah an thu an ṭhin sal thu, mipi an theihter.

July 18 ah Tender ngahtu company pawl khuatlang ṭhansonak hrang hnaṭuan theihnak lamzin an ongsak thu an phuang hlei ah, an ṭuan ṭha le ṭha lo ceek fel tuding committee tivek tiang an rak ruat cia zo.

Nan, July 21 ah cuih thusuah an ṭhiat sal thu mipi an sim thei ih, ralhraang ralkap budget tuahmi hnaṭuan zaten zoi pawlkom khal siseh, company pawl khal ṭuanter an si lo ding ti`n thu an suah.

Cutiih thu an ṭhin sal nak san cu mipi dorallian ralhraang ralkap thawn hnaṭuan tlang ti thawn a bangaw ruangah siseh, ralhraang ralkap pawl a thupthiar in khuate pawl tiang lutin an cangvai ding an phang ruangah a si ih, thu ruat ṭha sal in Mindat – CDF le Khuatlang ukhruaitu pawlkom thawn thurel tlangnak an nei sal hnu ah a thar in thuthluknak an tuah sal mi a si.

Leave a Reply

Your email address will not be published. Required fields are marked *