Ralhraang ralkap in Tedim ah ramtawi mino 2 an that

Chin ramkulh, Tedim peng, Saizang khawmi mino pahnih cu May 21 ah ralhraang ralkap pawl in an kai ih thalh sal nawn loin an that cih tiah theih a si.

An pahnih in ralhraang kut tuar in an thi zo tiah thuthang theih a si ih an ruak pawl cu tuini tiang sungkhat unau hnen ah an pe kir hrih lo.

Ramtawi tlunglam ah ralhraang ralkap duty pawl thawn an tongaw ih, cutin ralhraang kaih tuar in an nunnak tiang an lak sak tiah theih a si.

Ralhraang kut tuar Saizang khawmi mino 2 cu Pa Pau Za Muang, kum 21, le Tg. Pau Suan Thang, kum 29 pawl an si.

An thih thu ah Zomi Federal Union in ralhraang ralkap pawl an dem ih, siat tongtu innsang thawn bangran in kan tuarpi ve tiah May 24 ah thu an suah.

Saizang khua cu Tedim thawn peng 5 hrawng hlat ah a um ih, tuni May 25 tiangah ralhraang kut tuar mino 2 ruak pawl cu sungkhat unnau hnen ah a thleng thei hrih lo tiah thuthang kan thei.

Leave a Reply

Your email address will not be published. Required fields are marked *