Ralhraang ralkap in Chuncung ah Inn Urkaang

Falam-Hakha zinpi ih khua pawl siatsuahtu ralhraang ralkap cu Hakha peng, Chuncung khua ah an thleng ih, tuzaan July 14 zaan khawthim hrawngin khawsung inn pawl an Urkaang tiah thuthang kan thei.

A tu ca kan ngan lai khalah a kaang rero lai ih inn ziang zat a kaang zo ti cu nemhnget a theih hrih lo. Ramsung media ṭhenkhat ahcun amalbik inn 3 tal a kaang zo ti`n report a um.

Ralhraang ralkap hi Falam ihsin Hakha lam pan ih feh mi an si ih lamzintluan kahdonak ah ziangmawzat hrawng cu an thi zo. Mipi ralkap lam khalah ram le miphun hrang nunnak hlantu an um ih, hriam tuar khal an um.

Tuni July 14 khalah Chuncung ram sungah ralhraang ralkap le Chin ralkap ṭangkop pawl nasaten an doaw tiah theih a si.

Falam-Hakha zinpi ah Doawknak an ṭan sal

Siarbet : Falam-Hakha zinpi ah ralhraang le mipi ralkap an doaw

Tuni, July 14 ah Hakha peng Chuncung khua thlen hlan ah ralhraang ralkap le Chin ralkap pawl an doaw tiah thuthang kan thei.

Ralhraang ralkap hi Ramthlo ihsin Dokṭhek le Chuncung ramri ah zaankhat an riak ti a si ih, tuni ah hmai nor sal in mipi ralkap pawl thawn an doaw tiah thuthang a um.

CNA thawn naivaitu mipakhat in “Chuncung khua an lut tum thlang ih Hakha Rungtlang ihsin ralthuamtum thawn lamzin an sial sak. Atu hi Chuncung khua kiang ah Chin ralkap pawl thawn an doaw lai fang a si” tiah a ti.

Falam-Hakha zinpi doawknak ah ralhraang ralkap 60 lenglo an thi zo ti`n CNA ṭuanvonei Salai Htet Ni in a rel ih, tu ni doawk thu cu boruak zirin theih fiang a si hrih lo.

Ralhraang ralkap hi Falam ihsin Hakha lam pan in an poksuak nak zarhkhat ṭha a kim zo nan lamtluan ah Chin ralkap pawl in an rak do ruangah feh hmasawn thei lo in lamziin ah an tang lai fang a si.

Cupawl bawm dingin Hakha ihsin ralhraang ralkap 20 hrawng an thlah nan lamlak ihsin Chin ralkap pawl in an rak do.

Mizaan, July 13 ah Hniarlawn khawthar kiangah an kapaw ih ralhraang ralkap 4 an thi ti`n report a um.

Falam ihsin Hakha lam pantu ralhraang ralkap hi mipum 120 hrawng an si ding zum a si ih, CNA ṭuanvonei Salai Htet Ni rel mi vek a si le a hrek hrawng lawng an tang thlang tiah kan rel thei.

Leave a Reply

Your email address will not be published. Required fields are marked *