Pu No Than Kap cangvaihdan cun Chin-mipi a ti mangbang
Min Aung Hlaing hohami kawl ralkap in rampi ukhruai thuneihnak an la hnu, SAC ralhraang thawn pehparin a awaan theih ding a um lo tiih soiseltuar CNLD ṭuanvonei Pu No Than Kap cu May 21 ih tuahmi Union Election Commission meeting ih a va tel tikah Chinram mipi an mangbang thluh.
Cuihtlun ah meeting kai lo dingin thu botcat zotu Chin phunpi aiawh party pakhat a simi CNLD theihpinak tel loin meeting a va kai mi hin mipi a ti mangbang sinsin.
Pu No Than Kap meeting kai thuthawn pehpar in CNLD Chairman Pu Ngai Sak cun “thu kan theih dan vek a si le tuisun ih tuahmi UEC meeting ah Pu No Than Kap a tel ve. Meeting ah tello dingin simthannak kan nei. Ca khal kan kuat. Nan, ziangruangah meeting a va kai thotho ti cu kan thei loih kan mah lam khalin zingzoinak kan nei rero lai. Thuhla felfai kan thei lo CNLD FB cahmai in thuthannak kan nei ding” a ti.
Thu felfai thei ciang dingin Pu No Than Kap pehtlaihtum a si nan phone a phit ruangah thusutnak nei theih a si lo.
Ralkap ukhruainak hnuai ih tuah mi election hrang hmalak danding relkhawmnak ah rampumhuap party 59 an tel tiah theih a si. (CW)
