PPE kan hruh nak san kan thei ciang lo abang? – Dr. Tluang Cung Thang

Atufang Falam khuasung ah Covid 19 natnak a karh cak tuk hlei ah Covid natnei nemhnget mithi 20 luan an um zo.

Khua fate pakhat dinhmun in Falam ih Covid nat a karh dan cu a besia tuk tiah ruah a si ih, mipi him thei nak ding hrangah Lamziin phunphun hawlin Pawlkom zawngin siseh Siizung lam ih ṭuanvonei pawl khalin Covid nat karh dem deuh dingin mipi hnen ah theih ṭulmi tete simthanawknak an nei rero a si.

Tuni khalah Falam Siibawipi Dr. Tluang Cung Thang cun PPE (Personal Protective Equipment) thawn pehpar in mipi lam in kan thei tengteng ṭulmi thil thupi a pho lang.

Dr. Tluang Cung Thang cun “atufang kan boruak ih hmuh ding tam zet mi pakhat cu PPE kan hruh tikah Covid 19 natnak kai/ngah thei lo ding vekah kan ruat aw.”

“PPE cu Covid nat nei le Covid thawn a thitu pawl lakah him thei dingin humkhamawk nakih kan hruh mi a si. Asinan, miṭhenkhat cu PPE kan hruk/phoih dan a dik lo ih kiangkap mipi hrangah ṭih nung zet a si.”

“PPE hruk/phoih dan thawn pehpar in thupi zetih ka ruahmi pakhat cu PPE kan hruk tikah hman leh sal dingmi thilri (re-useable) tham lo hi a ṭha. Miṭhenkhat cu PPE kan hruh cingin phone kan tham ṭheu. Cumicu Covid dokhamnak hrangih ṭihnungbik pakhat a si. Curuangah PPE kan hruk cun Phone switch off mei ding a si” tiah a sim ih “PPE hruk/phoih dan cu thaizing lam ah pholang kan tum ding” a ti.

Falam ah May thlacem lam in Covid natnei an hmu thok sal ih, cuih ṭum in July 11 tiangah positive 402 le mithi 20 luan an um zo a si.

Siarbet : COVID a nei lo maw, a lang lo sawn a si pei…??

by Dr. Steven Cung Sin Thawng Luai

Mi hrekkhat pawl RDT thawn COVID kan test aw tikah Negative a si le lungawi zet in kan daithlang pang maw? Himi RDT Negative hin COVID nei lo ti a nemhnget(အာမခံ) thei maw?

Natnak pakhat hmuhsuak (diagnose) dingin step 3 in feh a si tlang pi ṭheu. Cumi cu –
1) Natdan thusuhnak (history)
2) Mina zohfelnak (examination)
3) Investigation (nat zirzoinak) ti pawl an si.

Tui COVID nat kan zoh awk nak ih kan hman ṭheu mi RDT test kit hi number pathum nak ih hman mi phun a si.

COVID nat hmuhsuak dingin zirzoinak kan nei tikih hman mi pawl cu ….
1) Real time PCR (nat pianhmang pawl a lang hlan ni 2 hrawng ihsin nat a lang hnu zarh 2-3 tiang a lang thei)
2) RDT for Antigen (nat pianhmang a lang hlan ni 2 ihsin nat a lang hnu zarh 1 hrawng tiang. (Hi caan ah hin nat mi an suan tam bik)
3) RDT for Antibody (nat ngah hnu zarh 2-3 ihsin thla 5-7 tiang. Si lole cu ai ih rei tiang a lang thei. Asinan tufang ih nat a nei le neilo theih a theih lo. (Nat a ngah dah zo ti nak a si.)

Tui kan hman rero mi a lenglam khal ih an zuar rero mi cu RDT for Antigen hi a si. Himi hin COVID nat a hmuhsuak thei nak (Sensitivity) hi 80% hrawng a si ṭheu. Curuangah COVID nat nei mi 100 ah 80 hrawng lawng hi a hmusuak thei ti nak a si. Cui tlun ah COVID nat nei minaa pawl hi an damlo hnu zarh hnih lole zarhthumnak hrawng in RDT thawn kan check sal a si le Negative a piah sal thei!!

Sim duh mi cu COVID nat kan check awk nak RDT ih Negative piah mi hi 100 ah 100 rin a theih hrimhrim lo. COVID nat kan check tik ih nemhnget theibiktu cu RT-PCR hi a si. A hlan first wave le second wave lai ahcun RT-PCR thawn nat check ding ah COVID rinhelh mi pawl ih Swabs cu paisa tampi cem in Yangon ih kuat a rak si ttheu. Cui lai khal ah RDT ih Negative piah mi mi tampi ih Swabs cu RT-PCR ah nathrik hmuhsuak mi tampi an um. RT-PCR is gold standard ti a si.(Sensitivity hi 99% hrawng a si.)

Curuang ah RDT ih nat kan check awk tik ah Negative result kan ngah a si le
1) COVID nat nei lo ngai ngai
2) COVID nat nei nan check dan palh deuh maw, thilri ṭha lo (technical error)
3) COVID nat nei nan a rei zo (hnar sung ah virus um mal lole um nawn lo)
4) COVID nat nei nan nat a piah lo mi 20 % ih rak tel ngah pang….tvk a si thei lai ruangah RDT test result Negative a si khal le nat ka nei lo ရိုးရိုးတုပ်ကွေး ka si ding ti men ih daithlang in mah duhduh ih um ding a si hrimhrim lo. Cu lawng si lo in RDT na check hnu khal ah nat na ngah sal thei.

Curuang ah tu lai kan dam lo a si len mah te zum hmang in sii ei in inn ah um men lo in tu le tu piah aw a si lole kutzim Oxygen tah aw cing cing in, SPO2 <92% a si ahcun a tlai hlan ah sizung lam pan lohli ding a si.

A tang lam ih X-ray zuk pawl hi COVID nat nei nan RDT Negative a piah mi minaa pawl ih X-ray zuk pawl an si. Hih minaa pawl cu Oxygen hawp ṭul rero hrih minaa pawl an si.

Hminsin : COVID nat dam ter thei nak sii a um hrih lo ruangah nat ngah lo ding ih ralrin hi a thupi bik.

Leave a Reply

Your email address will not be published. Required fields are marked *