Pa Bawi Ro Piang in a nupi hlun Nu Siang Ngun par kap that

Champhai, Kannan veng ih um Nu Siang Ngun par cu a pasal hlun Pa Bawi Ro Piang (mizo hmin – Lal Ro Paing) in February 15 zaanlam khawthim zik ah meithal thawn a kap that tiah theih a si.

Tualsungum pawl rel dan ah Pa Bawi Ro Piang le Nu Siang Ngun par cu tuhlan kum 6 luan zo lam ah ṭhenaw zo an si nan lailak ah fanau nei zo an si ruangah vengkhat ah um tlangin an pawhaw phahphah tiah an sim.

Khuami ṭhenkhat cun Pa Bawi Ro Piang hin um tlang sal dingin hruai kir a tum ṭheu nan Nu Siang Ngun par in umtlang a duh nawn lo ruangah an hruai khawsuakawk thei lo tiah an rel ve.

Tu ni ih a kap that nak san khal cu kopawsal a duh lo ruangah tiah miṭhen cun an rel nan 𝙲𝙷𝚊𝚖𝚙𝚑𝚊𝚒 𝙺𝚊𝚗𝚗𝚊𝚗 𝚟𝚌 cun “an kar lak ah ziangvek buainak a um ti kan thei ciang lo ruangah fiang zetin rel a har” tiah a ti.

Vengsungum mipakhat khalin “kan khawm lai ah call ka dong nan phone ka kai lo. Khawm thluh hnu lawngah hivek thil cang a um ti ka thei. Thu ka theih dan ah cun Lal Ro Paing hin a hnak ah a kap ih siizung lam khal an fehpi man lo. A thi cih.”

“Amahcu thlanglam ah a zuang thlak ih a hmutu pawl cun a dawp nakah a Ke khatlam a bai phah an ti. Cun, electric veng ihsin mawṭaw thawn a tlan. Mawṭaw a ngah dan hi an rel dan a bangaw lo. A hlang titu an um ih, a tawh thluh cia in a um mi cu ka hmang ta ding ti`n a tlanpi titu khal an um.”

“An nu hi kum 40 luan zo cu a si ciang ih an pa cu a hnakin a nauta ding. Nu pari hi pasal nei zo a si ih fa khal a nei zo. Pa Lal Ro Piang thawn fa an nei nan hawiruallo a si. Kum 10 hrawng a si.”

“Cun, Tualthattu hi tuhlan ah no 4 thawn pehparin thawng rak tlak dah a si. Cuvek ruangah veng ihsin an dawi dah zo mi a si. Cuvek a si tikah an nu hlun thawn an kar lak ah ziangvek thu a um ti ka rel ciang thei lo” tiah a ti.

Pa Bawi Ro Piang cu mawṭaw thawn a tlan ih a tu ah a umnak theih a si lo nan kiangkap naivai khua pawl ah thu an thanaw thluh zo ih palik lam khalin theitawk suahin an hawl tum tiah theih a si.