Na theih ṭul mi Falam Innkaang thu

Falam, Lampa veng ih inn 3 cu March 6 zaanṭim ah a kaang.

Inntek umlonak rei nawn zo mi inn 3 a si ih, a kaang thok dan theih a si lo.

“March 5, zaanthim hnu ah khaw laili ih inn pawl urkaang tumtu an um. Datsi thawn an urkaang tum nan vengsungum mipi in an phal man.”

“Cun, mizaan ah khawsung ziinkap ih ret mi mawṭaw cycle a hlo. Hivek thil hlo hi a um tuk lemlo nan, tuṭum hivek boruak ah hitin thu a um vivo bet cu mi thin a ti hring. Zaan khal kan it thaw thei lo” tiah tualsungum mipakhat in a rel.

Siarbet : Falam innkangh mi parah Thuruah ttul mi tete
Salai Mang H Luai

1. Falam khuasungah inn urkang duhtu an um asi ticu mit le hna ih theih asi thlang. Cumi in a fiangmi cu zo inn khal a him lo ti a fiang.

2. Thu kan suh cio mi cu zo in an ur, ziangruangah tile ziangtin misual kut in a humhim aw thei ding tihi asi.

3. Ramdang um hrekkhat cun Falam khuasung humhimtu neih a tul, tuah uh an ti. A dik kan ralring in kan humhim awk cu a tul nasa. Khat lam ah thu kan ruahtul mi cu humhimtu tiih kan retmi pawl ih humhimnak zoin a la lala diing ticu ruahtul ngaingai mi asi. Asan cu himi vek sirhsan ah laa in zaan ah meithal thawn vaak duh, inn tin ah a thupte mikhual kan lo check tiah a ti duhtu mi hnaihnaihnok pawl an um. Cun Asan cu inn cu sim lo zaan ih vaak zohman a him aw lo. Tuah uh titu pawl hi hlaral um ansi ih zaan dinhmun thate thei ngaingaitu ansi lo ruangah phurthut men ding cun nunnak a lakah liam a olte.

*** Cuti asile ziangtin kan tuah ding. Cutin maw kan um men in kan zohliam men ding. Si hlah ee, pakhat khat cu kan tuah tengteng a tul rori. Cuti asile ziang kan tuah ding. Kan tuahtul mi a thuailam vek in ka hmuhdaan ka lo hlawm hai:

* Inn lawnglak tawhhren men mi um lo dingin kan zuam cio pei. Sim duhmi cu innhngaktu kan um a tul. Falam khuasung hi inn hngaktu um lo, tlansan mi a tam deuh. Khuadang ralkian ih an tlan ruangah rak tlan ve kan tum lo a tha. Kan inn cu kan mah cio in tuanvo kan la tum pei.

*
Venghnen or innhnen pa le mino pawl a thuptli in peh tlaih awk dan kan tuah pei ih thu pakhat le thawmvang theih veten bur aw khawm thei dingin kan ralring cio atul. Duty pungsan ih asukso ih vaak cu tha ka pe lo nasa. Buainak a tam sawn ka zum.
*Lamzin pi kiangih um pawl kan inn hmai tleuter tengteng zuamcio uhsi. Meisa a rat lo caan khal ah solar meisa man ol tete bun zuam cio a tha. Inn hmai thim hlah seh tinak asi.

*Cun CCTV bun kan zuam cio a tha. Inn tin kan bun thei lo ding cu a fiang. Asinan a bun theitu hrekkhat pawl in zinkel khat tivek ih bun mi in misual pawl a rak kaingah thei. Venghnen a titheitu in bun cio a tha.

*A netnak ahcun nunphung nei lo Pathian tihzah lotu pawl ih tuahmi asi ticu kan thinlung in kan thei theh ko. Cun kan puhmi pawl in khipawl an si tiih an puh mi le an um lala tikah mipi a karlak ah kan um. Fim a tul, ralrin a tul, ralthat khat a tul.

Inn hngaktu,veng le hnen ngaihsaktu nu le pa, fala le tlangval kan tul, kan um khal a tul.

Leave a Reply

Your email address will not be published. Required fields are marked *