Mai Sokhlei Par relmi Pu Dar Lian Uk Thuanthu mawi

Tuini ah Falam Municiple President Pu Dar (a cafung hmin Salai Zinghmuh) in in colhsan thu ka rak thei ih ka riah a sia in poi ka ti tuk.

Pu Dar thawn hin 2012 kum ihsin kan rak theiaw thok. Thantlangah Media Workshop kan hung tuah ih culaiah anih hi tuanvo nei in Thantlangah a rak um ve laifang a si.

Kan thlen thuhla a theih veten thawhlam in do dingin kan zaten (Editor le writer pawl) in sawm ih cumi zing cu kan hmuhawk hmaisabiknak a si ti ka cing ringring lai. Anih cun a zal sungih thil a phorh ih,,,,,,,

“Na ca ka hmuh mi pohpoh siar lo mi ka nei lo.. hmatonih lo ton ka caknak a rei zo. Tuittumah na hung tel ve ti ka rak thei ih na hrangah hi ballpen hi ka rak lei,” a tiih pen mawizet te in rak pe. Reipi ka kol hngehnge.

Cumi hnu kum ziat simaw a rei hnuah Library ka ong.
Cutikah in run pehtlaihsal ih ziangvek lam cabu ka tul ti in sut. Ka sim vek cekci in cabu 12, a thar rori hi in rak leih. (Cabu in leih mi zuk ka ret cih).

Kan hmuhawk netabik ṭum..
Sim Dihai ah training ka hung pe ih ka tlunlamah Falam ka cawl. Ka thlen thu a theih veten in run bia ih Falam um calai mi pawl thawn suncaw eitlang dingin in sawm. Cutin amai zarah Falam writer Nhgepi, Cung Ngai le Bingbi Par pawl thawn nuam zetin kan rak tongaw khawm thei.

Salai Zinghmuh hi cangan mi a si ve ih curuangah kannih pawl in ngainatnak san a si. Amah vekih mi cukha paih le mi sunsak paihtu hi ka tong mal lai zet.

Tuini ah Salai Zinghmuh in leitlun a suahsan thu ka thei cu ka pamhmai lawlaw.. sim thiam lo khopin ka pamhmai!!
Ziangkhalle.. Siang lo cingten mangtha, Salai Zinghmuh.
Ka parih na thatnak pawl ka hngilh dah lo ding!!

========================

Atufang, Chin Relief-rehabilitation and Community Development Foundation Chairman ṭuanlai Pu Dar Lian Uk in tu ni July 29 ah rinlopin, cangsualnak ruangah in cem san a si. (A Thuanthu kimciang tarlang leh a si ding)

Leave a Reply

Your email address will not be published. Required fields are marked *