Tedim peng doawknak ah Ralhraang SAC ralkap 7 thi

Tuini, January 13, Tedim peng doawknak ah SAC ralhraang 7 an thi hlei ah ralhraang kut ih um Chin ralkap pakhat (Civic Defence Militia (CDM) – Siyin) a luat suak tiah PDF Zoland in thu an suah.

Thazaang 100 hrawng a simi SAC ralhraang rual cu January 12 ah Kalay ihsin Chinramlam ah an kaiso ih PDF ṭangrual pawl in lamlak ihsin an rak do tum nan khawmi pawl an hruaitel ruangah remcang loin kan kap theilo tiah PDF Zoland thusuahmi ah an ngan.

Ralhraangrual cu Theizang khua ah zaan khat an riak ih, tuini January 13 zianglam nazi 10 hrawngah PDF ṭangrual pawl thawn Theizang khua kiang ah an kapaw thok a si.

Doawknak ah PDF Zoland, CDM Siyin, Zogam Army le People’s Defence Army (PDA) hriamkai pawl ṭangrual in SAC ralhraang an do ih kahdonak ah ralhraang ralkap 7 an thi tiah PDF Zoland cun thu an suah ih “doawk nakah khawngaw le hriamtuar umloin dung kan siip thei saal” tiah an tarlang.

Boruak a sosang zet lai ah December 25 ih Lam hruaitu dingih ralhraang kaihkhih tuar Civic Defence Militia (CDM) – Siyin ralkap pakhat a luat tiah PDF Zoland thusuahmi ah an ngan tel.

Tu khalah PDF hriamkai ṭangrual pawl le SAC ralhraang cu Taingen khua ah nasaten an kap aw tiah PDF Zoland in thu an suah.

Boruak a sosang ruangah khualtlawng sukso lo dingin PDF Zoland in mipi an sim thei.

Leave a Reply

Your email address will not be published. Required fields are marked *