Facebook le Instagram a thi lawk cu camkhat hrang Leilungpi a harhdam

Leitlun ih social media tumbik Facebook le Messenger cu himi ca kan ngan tiang (a siat thok hnu nazi 2 luan) Leitlunhuap hmun tamzet ah ong theih lo in a um.

Facebook lawng siloin an mai ta a si thotho mi Instagram le WhatsApp pawl khal hman a theih lo. Culai ah nazi 2 sung lawngah Facebook stock zaṭek 5.5% a tlaniam.

Ziangruangah a siat ih ziangtiktiang a awh ding ti cu theih a si lo nan internet connection thuhla zirzoitu downdetector cun server lam a ciang lo ruangah a si tiah an tarlang.

Facebook le social media dangdang a siat ih leitlunhuap mipi an buai cupco lai ah hriselnak lam thawn a pehpar mi website le leitlun hminthang miṭhenkhat cun camkhat hrang leilungpi a hrisel tiah an tarlang.

Facebook (social media) le hriselnak

Mitamzet cun Facebook le social media dangdang hi thinnomnak ah hmang tum in khat le khat pehzomawknak ah an hmang. Asinan cuih lungawi thinnomnak cu a Lem a si ih lenglam ah hawipi thawn atakih pehzomawknak kan nei mi thawn tah ṭhim rual a si lo tiah mithiam pawl in an sim.

Social media hin camkhat hrang thinnomnak cu a suakter thei nan caan sau hrangah siatnak a suak ter sawn tiah zirzoinak neitu mithiamsang pawl cun an rel.

Social media le thinlung ruahnak lam thawn pehparmi zirzoinak neitu tamzet an um zo ih zirzoinak neitu zaṭek 98% cun caan sau hrangah thinlung le ruahnak lam lawng siloin bulpak nuntukhawsaknak tiang a khawng ban ti`n an hmusuak a si.

Cuih siatnak a suak ter mi cu ….

Thinlung le ruahnak lam a siat ter
Mawi ding ih tuah cawp mi zuk, video tivek kan hmu tikah mihiip dingin an tuah cawp/hrim mi a si ti kan theih hngilh ih kan mah thawn kan tah ṭhimaw tikah thinnaunak a suak ter.

Cuih thinnaunak cu caan sau hrangah hriselnak hrang tiang a ṭihnung tiah mithiam pawl cun an rel.

Like duh ruangah le sumsaw ngah tam duh ah ruallepi thawn nuam zet vekih an um lai an zuk mi pawl cu thutak ah kan ruat ih komtu nei lo, ngaihsaktu nei lo vekah kan ruat aw. Cumicun kan thinlung a ciah neh ih caan a rei tikah mah le mah siatsuahawduhnak lungput tiang a suak ter. Social media hmangtuk ruangah thinlung lam buai in mah le mah awk that aw tu hmuh ding an tam zet zo.

Ihhmu khawp lo
Zaan siim pipi tiang social media kan hmang ih kan hmang rei cun kan thinlung a ciah neh tikah tu le tu kan bih leuhleuh.

Cutikah theih lo sungah tikcucaan a rak feh liam vivo ih kan theih man hlan ah khua a rak vang mei.

Tlawngkai/Hnaṭuannak kan feh tikah kan mode a fuh lo ih cangsualnak maw, thil zirmi ngaih sak thei lo tiang kan um. Cumi cu kan pum cawmnak khalah siseh, hmailam hrang fimzirnak hrang tiang bulpak nun a khawng ban thei. Cuih tlun ah ihhmu khop lo ih um ringring cu taksa le hriselnak hrang ah a ṭihnung zet a si.

Mah le mah kan siat suah aw

Like le hminthan duh ah khawngaw, hliamaw thei dinhmun cangvaihnak tiang kan tuah. Cuvek cangvaihnak ruangih nunnak liam an tam zo ih hawiruallo ding khawp ih taksa siatnak tuartu khal an tam zo a si ………..

Leave a Reply

Your email address will not be published. Required fields are marked *