Hakha – CDF in Chinpa an kap that ngah

Mizaan, December 17 zaanlam hnu ah Hakha peng, Hranhring khuami Pu Biak Ceu cu penghuap CDF hriamkai pawl in an kap that ngah tiah theih a si.

Thu um dan cu December 17 ah, Hniarlawn khuathar kiangkap hrawngin ralhraang SAC ralkap pawl in meithal an puah ruangah tualsungum CDF pawl khal ralringin an rak um cia ti a si.

Cutiih boruak sosang deuh lai ah Pu Biak Ceu le a nupi cu mawṭaw cycle thawn an ra ih ralkap ah ruat pangin CDF pawl in an rak kap tiah CDF sungtel mipakhat cun a rel.

Vansiatthlak zetin Pu Biak Ceu cu a hmun rori ah a nunnak a liam ih, a nupi cu nungdamin a um tiah tiah theih a si.

Hih thu thawn pehpar in CDF lam in an mahlam tipalhnak a si thu, vansiat tongtu innsang hnen ah ngaidamnak an dil tum thu theih a si ih, khuatlang mipi ngaithiamnak khal, CDF in an beisei ti a si.

CDF sungtel sirhsan in hriamkai pawl tipalhnak a si tiah thuthang a suak nan, mithitu Pu Biak Ceu te nupa cu Hniarlawn Thar ah SAC ralkap kaih an tuar lawk thu Lungthlitum in a ngan.

Cuhnu ah, thlah saal an si hnu, Hranhring le Tiphul ziinpial an thleng ah CDF hriamkai pawl in an rak kapmi a si.

Pu Biak Ceu thih thu thawn peh par in mipi lakah hmuhdan phunphun a suak ih, khawmi pakhat cun hitin a rel ve. “Kawl ralkap ah kan ruat sual ruangah kan kap mi a si ti`n CDF lam cun an rel ve. Asinan SAC ralhraang pawl cu mawṭaw cycle pakhat lawng thawn khuate ah an feh dah lo. Cumicu CDF pawl in kan hnakin an thei ciang sawnmi a si” tiah a ti.

Leave a Reply

Your email address will not be published. Required fields are marked *