FTIMT in Dokṭhek Khua vehvai

Falam Township IDPs Management Team (FTIMT) ṭuanvonei ṭhenkhat cun March 4 ah Dokṭhek khua vehvainak an nei tiah theih a si.

Dokṭhek cu tubai March 2 ah ralhraang SAC ralkap pawl in inn 16 an urkaang nak khua a si ih thazaangpeknak le bomnak pek phah in FTIMT in an vehvai mi a si.

“Khuami pawl thazaang pek lohli dingin kan feh cihmi siih caakkhai bomnak tete tla kan phurh phah. An khua urciammi hi inn 16 a siih innsungsang 15, mipum 76 cu inn nei nawn lo ah an cang cih. Inn 2 khal pukpi ih kah ngah ruangah inn zate ti tluk in a siat ve. A reihlan ah bomnak thilri pawl thawn kan feh saal ding” tiah FTIMT ṭuanvonei mipakhat cun a ti.

Dokṭhek khuami zate deuh thaw cu Falam ihsin Hakha lam pan in ralhraang pawl an poksuak thu an thei veten sahimnak hawlin hramlak ah an beu ih, cumi sung ihsin kum upa, nauhak le nupinu 15 pawl cu Falam ih inn an hlaang sakmi ah beu ter sung dingin FTIMT ṭuanvonei pawl in an hruai cih tiah theih a si. (CH)

Leave a Reply

Your email address will not be published. Required fields are marked *