FPP USA In Falam Khawpi A Awi

Tlangdang Khuapi Ramnuam Hmuncangkang ah um cingin suahsemnak theihhngilhlotu Falam Pacangno Pawlkom USA cun seherhnak tumpi le thazaangpeknak thawn Falam Khawpi an awi.

An nih hi, SAC ralhraang in rampi ukhruai thuneihnak a la hnu, kan khua kan ram hrang ṭanla dingih dinsuahmi pawlkom an si ih, Dothlengnak thapetu le ziinkong dangdang hmangin kan khua kan ram hrang ṭanpinak nei ṭheutu an si.

Sungtel bulpak thawhkhawm nakin siseh, Pawlkom hmin thawn kuthlannak tuahin kan khua kan ram le miphun hrangah napin hnaṭuantu an si.

Falam Pacangno Pawlkom, USA …… Cakuat

Dear,
Falam
Kan duhdawttuk mi FALAM na dam maw? Hngilh ni neilo a sun zaan in kan lo mang ringring. Harsa, lungkuai thinna leh riahsianak phunkim in a lo nuai nasa nan cak zet in leh tluklo in na ding ringring. Ṭhaal caan ah sakhi in sihti angai bang in kan lo ngai.

Nu in fapa tlanhlo cu hngilhni a nei dah cuanglo bang in, nang cun na ṭanghlum sung ah pom in ret in duh in ngai ti tla kan thei. Khuahla ah kan um ko nan, fa in hringtu nu ih hnawiti a haal bangin kannih tla na cerhti thiang leh thli thiang na mawinak ngai in kan mitthli atlak caan tamtuk sokhaw. Kan lo hngilh dahlo sokhaw.

Tu kum in cu kum (130) tla na kim thlang ih pa Pathian in dam cahnak lo pe vivo hram seh, na nun khua sau hramseh ti ah Falam Pacangno Pawlkom (USA) khal in thla za kan lo cam sak.

Thlapau dothlennak ruang ih na tuar zia le na thinhhar daan kan lo ruat sak tikah kan umnak hmun in kan mitthli a luang. Na fale pawl in Nu ih ṭanghlum lo tansan in ram ah an riak, khuahlum khuasik lakah zonzai zet in an um ti na hmu tikah ziangtluk na riahsia ding ti kan ruat tikah kan thinlung a kekkuai.

Maw…Falam..na riahsia hram hlah. A rei hlan ah na hnen ah rak kir sal in khuang leh dar thawn kut za pharh in hlapi thawn kan lo awi sal ding.

Na dai na hlum ah siseh, na thim na vang ah siseh, na cak caan le na thanau caan ah siseh na hrangah rin um ten kan hrang ih na ṭhatnak pawl thlir kir sal in Pathian mithmai zoh in thudik le ralṭhatnak thawn kan lo dinpi ringring ding.

𝙵𝚊𝚕𝚊𝚖 𝙿𝚊𝚌𝚊𝚗𝚐𝚗𝚘 𝙿𝚊𝚠𝚕𝚔𝚘𝚖 (𝚄𝚂𝙰) “Falam Hrang Ah Kan No Ringring”

***𝙵𝚊𝚕𝚊𝚖 𝙿𝚊𝚌𝚊𝚗𝚐𝚗𝚘 𝙿𝚊𝚠𝚕𝚔𝚘𝚖 (𝚄𝚂𝙰) pehzom in kan khua kan ram hrang bawmnak na pe duh le hinah hmet FPP USA

Leave a Reply

Your email address will not be published. Required fields are marked *