Falam peng, Rihkhawdar doawknak ah ralhraang SAC ralkap 9 thi

March 5, Rihkhawdar doawknak ah amalbik ralhraang SAC ralkap 9 an thi hlei ah hriam tuar tamzet an um thu cu CNO/CNDF in March 5 zaan ah a tarlang.

Chin Ramkulh, Falam Peng, Rihkhawdar pengṭhen ih um SAC Ralhrang hmunkhuarnak cu March 5 zinglam nazi 6 kim zik hrawngah CNDF le hriam kai ṭangrual pawl in an kap.

Cumicu, March 5 zinglam ṭumkhat kahawknak a si ih doawknak ah ralhraang ralkap 5 an thi hlei ah hriam tuar tamzet an um.

Rihkhawdar pengṭhen, veng No 1 khalah khawvang hnu ah doawknak a suak.

Zinglam nazi 8 hrawngah CNDF le hriamkai ṭangrual pawl in ṭanhmun ṭhenaw in an va kap betih doawknak ah SAC ralhraang 4 an thi.

Mipi humhimtu hriamkaibu komkhawm cu himten dung an sip thei tiah March 5 zaan ih CNO/CNDF thu suah mi ah an ngan.

March 5 Rihkhawdar doawknak ah mipi humhimtu hriamkaibu komkhawm sungtel a si mi CNDF, CNA/F, PDF – Zoland, CDM – Siyin, le CDF – Hualngo tipawl an tel tiah thuthang kan dong

(Hminsin : Khawvang zawngih doawknak thu cu kan tarlang zo ih nazi 8 hrawng ih doawknak thawn March 5 Rihkhawdar doawknak ah amalbik ralhraang SAC ralkap 9 an thi tinak a si.)

Leave a Reply

Your email address will not be published. Required fields are marked *