Falam peng ih SAC ralhraang Keneh pawl

October thlathok lam in Laitlanglam ra kaisotu SAC ralhraang rual cun Falam peng ah inn 25 hnakih mal lo an urkaang ih inn 100 hnak ih tam an boh hlei ah khuami pawl ih innzuat ṭilva telin thil tamzet an fir.

Kalay ihsin Falam an pan lai ah Tuphei khuami mipahnih an kap that ih ziinkap ah ruak an hlawn ta. Cuih ruak cu nihnih hnu lawngah khuami pawl in an hmusuak.

“October 11 ah an kap that. An pannak khua lam ihsin SAC ralhraang rual an ra ih Lamziin ah an tongaw siding. October 13 lawngah an ruak pawl kan hmusuak” tiah khuami pakhat cun a rel.

Falam-Kalay karlak ah mithiruak pahnih an hmu

Ralhraangrual cu raldonak tank telin mawṭaw 50 hrawng thawn an si ih Lumbang ah zaankhat an riak ta. Lumbang an um sung khalah khuami pawl ih ei-in thilri tamzet an fir sak tiah theih a si.

Falam ah zaankhat an riak hnu ah Hakha lam pan in an pok suak ih Lamzintluan ah Rialti, Thlanrawn le Ṭaal khua ih inn pawl an urkaang.

SAC ralhraang in Falam peng ah Inn 7 hnak ih mal lo Urkaang

“Ralhraang an rat hlan ah khua suahsan in beunak kan hawl. Culo sehla cu an kut tuar in kan thi thluh ding. Inn pawl an urkaang hlan ah innsung an cawk let thluh ih thil ṭha deuh hmuahhmuah cu an la thluh ta” tiah tualsungum mipakhat cun a rel ih “Biakinn khal an urkaang” a ti.

SAC ralhraang in Thlanrawn Khuathar Urkaang thok

SAC Ralhraangrual cu October 19 ah Ramthlo khua ah zaankhat an riak ih khua ih an um sung caantawi takte ah inn 100 lenglo an boh. Cuihtlunah Fangfai, innsung thilri man nei deuh cin le innzuat rannung pawl an fir tiah theih a si.

Ramthlo khua ih SAC ralhraang thil siatsuahmi

Hakha lam pantu SAC ralhraang rual cu Falam peng an um sungah Chinram hriamkaibu (CNF, CNDF, CDF …) ṭangrual pawl in theitawk suah in an rak kham ih doawknak ah ralhraang 20 hnak ih mal lo an thi hlei ah mawṭaw 15 hnak ih tam an siat sak tiah kan thei.

Falam : SAC ralhraang le Chinram hriamkaibu doawknak – Update

Tudinhmun ah SAC ralhraangrual cu Hakha khuasung ah an lut thei zo tiah theih a si ih, ziangvek in an cangvai ding, khuasung ah an kapaw pang pei maw …. tvk cu Leitlun kilkip ih um Chin mipi in thinphang zetin kan umnak hmun cio in Chinram dinhmun kan thlir a si.

Leave a Reply

Your email address will not be published. Required fields are marked *