Falam kiang ah SAC ralhraang le Hriamkai ṭangrual pawl kap aw

Tuini, January 28 zinglam ah Falam peng, Thlanrawn khua kiangah SAC ralhraang le Hriamkai ṭangrual pawl an kapaw tiah theih a si.

Falam ih riaklawktu ralhraang SAC ralkap pawl cu mizaan February 27 ah Falam ihsin Hakha lam pan in an pok suak ih Lungpiveng an thlen ah meithal nasaten an kap puak.

Doawknak zianghman a um hran lo nan kiangkap naivai ihsin rinlopin kahdo an phang ruangah meithal an hmetpuak tiah ruah a si ih, an mah cu Lungpi biakinn ah zaankhat an riak ta tiah kan thei.

Cuih hmun ihsin Hakha lam an pan ih Thlanrawn kiangkap an thlen ah hriamkai ṭangrual pawl in an rak kap ti a si.

Tualsungum mipakhat cun “Lungpi ih an caam lawk sungah inn tamzet an boh. Inn an cawklet thluh ih thil an duh zawng hmuahhmuah an fir thluh. Kan him deuh pangah ti`n biakinn ah an riak. Hakha lam pan ih an pok suak hnu, Thlanrawn kiangkap ah hriam kai pawl in an rak kap ti`n kan thei. Hramlak ih beutu ralkian pawl khalin bomb puak le meithal awn kan thei” tiah a ti.

Kawlrawn ihsin Laitlanglam kaisotu ralhraang SAC ralkap pawl cu lamtluan ah ciilnuai an tuar rero zo ih, tuizing kahdo thu thawn pehpar in atu ca kan ngan tiangah CNDF in thufelfai an suah hrih lo.

Ralhraang SAC ralkap ṭih ah Falam-Hakha ziinpi ih khuami pawl cun sahimnak hawlin khua an suah san thluh tiah kan thei.

Leave a Reply

Your email address will not be published. Required fields are marked *