Falam hrang thil phur ṭheutu Truck mawṭaw tumpi cu tu ni tiang a umnak theih a si lo

Kalay ihsin Falam hrang thil phur ṭheutu Chin Cherry thilphur mawṭaw cu kan dung April thlalai hrawngin a hlo ih tuni tiang a umnak theih a si lo.

Thil tampi phur in Kalay ihsin Falam an pan lai ah Sithar khua kiangah ralhraang ralkap pawl in an kai ih mawṭaw mawngtu le a thluntu pacangno pahnih an that tiah theih a si.

Thuhla felfai theihsuak a si veten ချင်းချယ်ရီ ကလေး-ဖလမ်း ကုန်စည်ပို့ဆောင်ရေး FB cahmai ah “unau vekih kan ruahmi CungCung le CungNi in intansan tiah kan thei ih kan riahsia zet” tiah tarlangin zarhkhat hrawng Chin Cherry gate an phit ding thu an tarlang.

Ralhraang SAC ralkap in mawṭaw mawngtu le a thluntu an that hlei ah cuih ni ihsin an kaihmi Chin Cherry mawṭaw le paisa tamzet man thilri phurmi cu tuini tiang a umnak an thei lo.

Hih thu thawn pehparin ချင်းချယ်ရီ ကလေး-ဖလမ်း ကုန်စည်ပို့ဆောင်ရေး cun May 11 ah a hnuailam bangtukin FB cahmai ah an tarlang.

“Tuhlan ih vanduainak thil thleng thawn pehparin tuni tiang kan tuarin kan riahsia lai. Zaan mangsia ihsin luat suak thei dingah tuni tiang kan talbuai lai. Duhdawtmi kan unau 2 telin mawṭaw le khual tlawng pawl thilri tampi cu tuni tiang kan sung lan ih kan tuar na zet.”

“Thilri neitu pawl hnen ah hmatonin siseh, phone thawn khal ngaithiam kan dil thei thluh lo mi par ah poi ti in kan hmasong zet.”

“Thilri neitu in sunralmi par ah ruatdangnak neiloten hmailam ah kan zuam tlang ding tiih tha in pek mi hin hmasongnak a ti zual ih, sunralmi ruat loin in tuarpimi par ah Pathian in thlawsuah lo pe hram seh.”

“Phone thawn pehtlaihnak kan nei thei hrih lomi thilri neitu tampi an um lai ih, an hrangah ṭha theibik tuah sak kan zuam rualin mipi riantu gate pakhat kan si theinak dingah thazang in la pi uh………”

Tuhlan ih kan rak tarlang zo mi Original Post (2022, April 16)

Lairawn boruak sosang lai ih that tuar Chin Cherry thilphur mawṭaw mawngtu rualin mawṭaw thluntu pacangno pakhat khal ralhraang SAC ralkap pawl in an that ve tiah kan thei.

Chin Cherry thilphur mawṭaw cu Kalay ihsin Falam lam a pan lai ah ralhraang SAC ralkap pawl in Sithar khua kiang ah an rak kai.

“Cuih hmun ah mawṭaw mawngtu an that ih meisa thawn an urkaang. Amah rualin mawṭaw thluntu an that bet” tiah tualsungum mipakhat cun thu a theih dan a relfiang.

Thuthang suak pek ahcun mawṭaw mawngtu lawng that tuar vekin an rel ih, mawṭaw thluntu pawl an hlo thluh ti`n thu a um.

Asinan, ချင်းချယ်ရီ ကလေး-ဖလမ်း ကုန်စည်ပို့ဆောင်ရေး FB cahmai cun unau vekih an ruahmi CungCung le CungNi in intansan tiah an tarlang ih “Cung2 le CungNi in Pathian ṭanghlum ah in colh san ruangah April 15 ihsin thok, zarhkhat hrawng Chin Cherry gate kan phit ding” tiah an tarlang.

Ralhraang SAC ralkap kut tuar Chin Cherry mawṭaw mawngtu cu Congṭhe khuami a si ih an pahnih in innsang fanau nei zo veve an si.

Leave a Reply

Your email address will not be published. Required fields are marked *