Falam ah Tlawngta hringhronak ca tar ruangah nauhak pawl Tlawngkai ngam lo

Tuni June 14 ah Falam khuasung, အ.ထ.က 2 Tlawng zin ah Tlawngkai pawl hringhronak ca tar a um ruangah nauhak pawl Tlawngkai ngam lo in an kir sal tiah theih a si.

“Thlawng kai hlah Falam Hmin Na Sia Ter” ti`n le, caphekdang pakhat ah “Nan Fa Pawl Ruak Nan Hmu Duh A Si Le Thlawng Kai Ter uh” tiah tarlang a si ih ca tartu hi zo bik an si ti theih a si lo.

Zo pawl tarmi ti cu theih fiang a si lo nan “Tlawng” tiding ai ah “Thlawng” tiih ngan mi a um tikah lai ca ngan thiam hnai lo, ralhraang ralkap an si men thei tiah zumnak a um a si.

Mizan, June 13 zaan thim hnu khalah အ.ထ.က 2 Tlawng kiangkap ihsin khawmi pawl in puakkuai thawm an thei thu an rel ih, meithal puak thawm a suak bet titu khal an um.

2021, May thlacem lam ah အ.ထ.က 2 le အ.မ.က 5 Tlawnginn pawl ah bomb a puak dah zo. Cuih ṭum ah Tlawnginn pawl nasaten a siat a si.

Hivek boruak a um hnu, June 14 zaan nazi 8 hnu ah khawmi pawl lengsuakvak lo dingin ralhraang ralkap in thu an suah tiah theih a si.