Dr. Run Bik – Falam bazaar thar hrang hmalaktuding Bazaar Building committee an din

NLD cozah san lai ihsin an rak buaipi rerozomi Falam Bazaar thar innpi sak nak ding thawn pehparin hmalaknak neituding Falam Bazaar building committee an din zo tiah theih a si.

April 26 ah tualsungum upa 30 lai cu Falam senpi inn ah thu an rel khawm ih, Yangon ih India embassy hnen ah bazaar thar hrang bawmnak diltu dingah Bazaar Building committee an din mi a si.

Bazaar Building committee Chairman ah Dr.Run Bik Tai Thio, Vice ah Pu Van Tun (EO.Municipal) le Pu Khawl Ṭhuam, treasurer ah Pu Mang Lian, bawmtu ah Pi Len Mawi le Pastor Biak Cawm tipawl an si ih committee member zaten mipum 19 an si.

Thuhla pholangtu Dr. Run Bik cun Falam bazaar thar din theinak dingah thlacamnak thawn ṭanpi cio dingin mipi a sim thei.

Siarcih : Falam Bazaar thar hrang hmunhma an zoh (January 5, 2021 ih ngan mi a si)

January 2 ih Falam Seenpi Run Inn on-puai an tuah ṭum ah Chinram CM Salai Lian Luai le ṭuanpi pawl in Falam bazaar thar hrang hmunhma zohnak le dawr tuah pawl thawn hmaton thurel ruahnak an nei.

Falam Seenpi Run Inn on-puai ṭiak hnu ah CM Pu Salai Lian Luai le ṭuanpi pawl cu bazaar ah feh in dawr zuar pawl thawn bazaar saknak hrangih hmalaknak neih ṭulmi pawl ruahronawknak an nei.

Falam bazaar thar cu India cozah bomnak dil saal in saksuak beisei a si tiah Dr. Run Bik in a rak sim nan MP Pu Zung Hlei Thang in India ram ih bomnak million 50 cu kum 5 sung hrangah hman thluh a si zo ih cuih bomnak thawn sak a theih nawn lo ding a ti.

Cuvek dinhmun a si ruangah CM Pu Salai Lian Luai cun sumpai neitu pawl sawm in sumphunnak tuah ter thei an beisie thu dawr kil pawl hnen ah a sim.

Amah cun “dawr neitu pawl khal in dawr khaan man kha nan pek cia dingih nan tefasin tiang nanmai`ta a si ding” tiah a sim ih “Hakha ahcun hanghnah hangrah zuarnak hmun cu khung 1 ah Ks. ting 30 pek remcang an ti vekin Falam khal ah tuah a ṭul ve ding” a ti.

Asinan haanghnah hangrah zuartu pawl cun khung 1 ih kyat ting 30 pek cia ding cu an harsat ruangah Bazaar Committee din hmasa an duh thu an sim ih CM Salai Lian Luai khal in a ṭuan duhtu pawl thawn relkhawmnak nei dingin forhfialnak a nei.

Leave a Reply

Your email address will not be published. Required fields are marked *