CNO/CNDF in ralrinpeknak le theihternak thu an suah

Dothlengnak ih hruaitu luban pakhat a si mi National Unity Government (NUG) in September 7 ih rampumhuap raltho ṭhangphawknak thu a than hnu in ramkulh pengṭhen ih ralkapbu ṭhenkhat cun cangvaihnak an nei ding thu tlangthannak an nei cio.

Cuvek ṭhiamṭhiam in SAC ralhraang do in Chin ramkulh, Falam peng le Lairawn tiang cangvainak neitu Chin National Organization/Chin National Defense Force khalin ralhraang do nakah hmual nei zetih cangvai thei dingin a hnuailam bangtukin thusuahnak an nei a si.

CNO Thusuah (8/2021)

Ram Dingkhawm Myanmar Rampi, National Unity Government (NUG) cun tuini September 7, 2021 ah Thusuah (1/2021) in rampi cu caakkhai dinhmun ah a din thu a phuang a si. Curuangah kannih CNO/CNDF khal in State Administration Council (SAC) cimih theinak dingah thusuah kan tuah a si.

(1) Tuini September 7 ihsi thokin Chin mipi in mah le titheinak zawn cio ih telpi in daan lo vekih thuneihnak latu SAC cu a phunphun ih do dingin le SAC ih an thuhla thup pawl cu a caankhel-in mah le naivai CNO/CNDF hnenah a sidan vekvek ih thu thlen dingah kan lo sawm a si.

(2) NUG in ni khiah um loin acozah hnaṭuan cawl dingih a phuan bangin SAC hnuaiih hnaṭuan rero lai zung hnaṭuan Non-CDM pawl khal in mipi thu thlun dingin kan lo theihter a si. Mipi thuthlun duh lo Non-CDM pawl parah thil pakhatkhat a thleng pang asile ṭuanvo kan la lo ding.

(3) SAC ih tirhkah Pyu-Saw-Htee pawlkom le Dalan pawl khal in nan tuahmi bansan cih dingin le nan bansan lo asile nan nunnak thu ah mawhphurnak kan lak lo ding thu a hleice in ralrinnak kan lo pe a si.

(4) SAC Ralkap le Palik pawl khal CNDF thawi’ tuantlang dingin thungai thlakin kan lo forh a si. Hriamhrei kimcang thawi’ in rung pan a si ahcun CNO/CNDF in ting 50 MMK laksawng kan lo pekih hleiah nan sahimnak tiang ṭuanvo kan lo laksak ding a si.

(5) Kan Rampi caakkhai dinhmun ih a din ruangah mipi zate’n lo thei lo thil ti lo ahcun suakvak lo hram dingah kan lo ngen a si.

(6) NUG in caakkhai dinhmun a phuang ko nan, mipi pawl luarkai tukih thlaphang loin lo thei loih kan tulmi; ei-in le siivai pawl sekkhawl cia dingin le, mah le sahimnak cio hrang ralring thiam dingin kan lo theihter a si.

A tlunih ralrin peknak le theihternak pawl hi ngaihthah loih thlun cio dingah kan lo theihter nolhsal a si.

Information and Public Relations Department
Chin National Organization

Leave a Reply

Your email address will not be published. Required fields are marked *