CNDF ralkap Shalom Siang Thang Lian thih thu ah CNDF Spokesperson le CNDF ralbawi Annka

CNDF ralkap Salai Shalom Siang Thang Lian telin Kalaymyo ih Thawngtlak mi 7 cu Thawnginn ihsin an tlansuak tum ruangah kah that an si ti`n SAC ralhraang in mizaan March 15 ah thu an suah.

Ralhraang thusuah thawn pehpar in CNDF spokesperson Cung Ngai cun zum a um lo thu a rel ih “Thawnginn ihsin an tlansuak tum timi cu thil cang thei a si lo lawlaw” a ti.

“Ralhraang sual rapthlak zia a lang. Atufang boruak ah Thawnginn ihsin tlansuak tum ngam ding khawpin kan nauhak pawl ruahnak nei lo an si lo ih, at thlak zetmi hivek cangvainak an tuah ding zum a um lo. Thu ruat thei an si zo.”

“An mah ralhraang sawn in buainak suak dingin an tawthok sawn si ding. Thawnginn ihsin an tlansuak tum timi cu a cang thei lo” tiah amahcun a rel.

Thawnginn/palik thawn naivaitu hminthup mipakhat khalin Thawngtlak ciocio ah thleidanawknak a na tuk. Abikin pukmah 505 thawn Thawngtlak pawl hi an nuaineek hleice tiah a rel ih, cuvek ruangah buainak a thok mi a si a ti.

Buainak tawthoktu tiih puh mi Salai Shalom Siang Thang Lian cu CNDF ralkap a si ih, Kum 2021 June thla ah ralhraang pawl in an kai ih pukmah 505 thawn thubuai an tuah sak.

Siarcih : March 15, Kalaymyo Thawnginn ih buai ṭan dan relfiang

March 15 ih Kalaymyo Thawnginn buainak thu relfiang

CNDF spokesperson Cung Ngai cun “amah hi Falam ih kan rinsan zetmi mino pakhat a si hlei ah ram le miphun hrang pumpeaw zettu a si. Nunrawng SAC ralhraang in lainatnak nei lo zetin kan mino in that sak mi hi kan nih CNDF in kan dem ih, thihhlohnak a tongtu par ah CNDF in a sangbik upatnak kan pe” tiah a ti.

CNDF ralbawi David New khalin Salai Shalom Siang Thang Lian thih thu ah SAC ralhraang nasaten a dem ih “kan ralkap in that sak mi par ah thungrul dingin timlamnak kan nei”.

“Kan nih hmuah tikap ih ralhraang itthat pawl kap that thei dinhmun, hun remcang nei cingin mipi mithmai zohin kan kap lo ih dung kan siip sal. Kan kai mi ralhraang pawl khal ṭhaten kan zohkhen ih rawl ṭhaten kan pek. Nan, nan nih cun hriamhrei ralthuam ziang hman neilo, kan unau Thawngtlak pawl nan kap that. Curuangah nan tuah mi par ah tuar dingin ralring cia uh. Phuba kan la ding” tiah a ti.

March 15, Kalaymyo Thawnginn buainak ah nunnak liam CNDF ralkap pakhat le hriamtuar besia CNDF ralkap pakhat an um tiah kan thei.

Leave a Reply

Your email address will not be published. Required fields are marked *