CNA/CDF kut tuar in a thimi Pu Mang Cin cu Dalan a si lo – HKRC

Dalan tiah puhin November 10 ih an kap thatmi Pu Mang Cin cu Dalan a si lo ti`n thuhla felfi zirzoitu Hakha Khuathar Relief Commitee in thu an suah.

Thusuah ih nganmivek a si le Pu Mang Cin cu Dalan pakhat dinhmun in November 10, zaanlam nazi 5:30 ah CNA le CDF pawl in an kap that ti a si.

Pu Mang Cin kah that thu thawn pehparin Khuathar CDF Council khalin felfaiten thuhla zirzoinak an nei nan Dalan a sinak fiangfai in an hmu lo. Curuangah Dalan tiih an puhmi cu hramhnget neilomi puhawknak menmen a si tiah thusuahmi ah an ngan.

Cuihthlunah Pu Mang Cin kahthat a sinak thu ah Hakha CDF Council zate lungkimnak siloin pakhat-hnih khuakhannak thawn CDF – Hakha le CNA in an kap thatmi a si ruangah Daan loin an kap that ti`n an pom thu, thusuahmi ah an ngan tel ih “a kap thattu hriamkaitu in mawhphurnak a lak tengteng ṭul” tiah an tarlang.

“Pu Mang Cin hi hriamkaimi siloin khuami meimei a si ih, CDF Hakha le CNA in thusutnak zianghman nei hran loin a thupten a inn ih an va kap that mi cu hriamkai phungdaan an buar mi a si ruangah nasaten kan dem a si” tiah thusuahmi ah an ngan ih “Hmailam caan khalah thu um hruthra loin CDF le CNA kut in thi ding kan si lo. Asancu mipi` rinsannak, dinpitnak a hloter theimi a si hlei ah Dothlengnak hmuitinmi le thazaang a tolhter thei a si” tiah an tarlang.

 

Leave a Reply

Your email address will not be published. Required fields are marked *