CNA Chairman Pu Zing Cung in Chinram Dothlengnak a cak sin thei dan ding “key point” a rel

SAC ralhraang in kumpi cozah thuneihnak a la hnu ih dinsuahmi CDF Chin ralkap cu CNA ah lut thluhin CNA thupeknak hnuai ah ralhraang do seh la hmual a nei sinsin ding ti`n CNA Chairman Pu Zing Cung in online thurelkhawm nakah a rel.

“CDF thawn ṭangkopin atu cangvaihnak a um rero mivek tuah suak dingah CDF ralkap pawl CNA ah lut hai seh la, thupeknak pakhat hnuai ah kai hruaiawk a si dingih Dothlengnak hmual a na ding. Kan tumtahmi ah kan thleng thei lohli ding. Doawknak khalah ṭha zetin kan cangvai thei ding. Cumicu zo cio thei thluh mi a si” tiah CNA Chairman Pu Zing Cung in a ti.

Pu Zing Cung cun hriamkai pawlkom hmin vuah mi thawn khal a khaikhin ih “CNA cu Chin ralkappi an si. Miphun aiawhtu ralkap an si. CDF cu Chinland Defense Force ti a si ih ram le miphun humkham dingih din mi a si.”

“CNA cu hmunram pakhat lawng siloin Chin ramkulh hmuntin ah fehin hna kan ṭuan, hmuntin ah ral va do mi Chin ralkap kan si ih rampumhuap zawngin CNA in ṭuanvo kan nei. Chin phunpi hum dingah CNA in ṭuanvo kan nei. Cuhleiah Chinland kan ti mi, cuih ram pawl khal CNA kut ah umter dingin ṭuanvo kan nei” a ti.

Pu Zing Cung cun a pakten Chinram zalennak kan ngah tikcucaan hrang khalah Chin ralkap nei ṭhat a poimawh zia a rel bet ih “Federal ralkappi kan din tikah Kawl pawl lawngih ukmi ralkap a um thotho lai cun tuvekin thuneihnak lakin rampi buainak a suak thei ruangah kan nih Tlangpar mi pawl in raldo fimthaimnak lam zirhawknak siseh, Thlipar ralkap, Tipar ralkap tivek hrang tiang kan rak ruat thiam cia ṭul.”

“Cuvekin ralkappi din leh ding a si ruangah CNA cu a thupi zetmi dinhmun ah a rak um. Curuangah CNA thazaang cak ding a thupi zet. CNA tha a ṭha cun kan miphun tha a cak ding” tiah a ti.

Atu dinhmun ah rampumhuap in SAC ralhraang do rero lai a si ih, Chin mi hrangah tuvek tikcucaan ṭha ngah saal a theih nawn lo ding ruangah Dothlengnak thacaksin dingin hnaṭuan zuamnak thawn ṭuan tlang cio dingin le CNA a cak sinsin theinak dingah mizapi ṭanpinak a ṭul thu, CNA Chairman Pu Zing Cung in a rel a si.

Leave a Reply

Your email address will not be published. Required fields are marked *