Chin ralkap ṭhenkhat Ke kar dan thlenghdanglam thok

Chin ram mipi ralkap zaten ralhraang thawn hnaṭuan tlanglo dingin le an mah thawn pehparmi hnaṭuan siseh, pursum tuahnak tivekpawl kham thluh dingin aupi ṭheu a rak si nan, atu ah Mindat CDF le lailak khawtlang ukhruaitu pawlkom cun thu feh dan tidanglam in an Ke kar dan an thlengh thok.

2022, July 18 ni khenmi Mindat peng, khawtlang ukhruaitu pawlkom thusuah ah SAC cozah hnen ihsin tender ngahtu company pawl cu Mindat peng sungah hnaṭuan theihnak lamzin on sak an si zo thu, an tarlang a si.

Hih thu ah khawtlang ukhruaitu pawlkom le CDF – Mindat thu rel tlangnak an nei hmasa ih, mipi zawnruatin le khawtlang ṭhansonak hrang ruatin Tender ngahtu company pawl cu an ram ah hnaṭuanter dingin an lungkim.

Tender ngahtu company pawl hnaṭuan theinak lamzin an ong sak rualin atakin hna an ṭuan tikah ṭuan ṭha le ṭha lo zohhliah tuding pawlkom din cih a si ih, cu pawl in ceek felnak an nei ding ti`n thusuahmi ah an ngan tel.

Hih thu ah Chin mipi hmuh dan a ṭekaw ih “ralhraang thawn hna ṭuan tlang an tum titu an um bangin, hnaṭuan ding um lo ruangih ram suahsan thluh hnak cun an khuakhannak hi a ṭha rori titu khal an um ve.

Tu dinhmun ah Chin ralkap sungah hitiih Ke kar dan thlengh thoktu hi CDF-Mindat lawng an si lai ih, midang pawl teh ziangtin Ke an kar ding ti cu a tikcu kim tik lawngah kan theifiang leh ding.

Zuk : CDF – Mindat

Leave a Reply

Your email address will not be published. Required fields are marked *