CDF – Zotung in a ralkap 45 a bangter

CDF – Zotung pawlkom lakah kum thok lam ihsin buainak napi a suak ih kan dung June 10 khalah Sakhaan luhcilhawknak tivek tiang a suak dah zo.

CDF – Zotung tatyin 1 Sakhaan luhcilhtu cu CDF – Zotung deu pawl an si ti`n Chinland Defense Force – Zotung Organization (Supreme council) in June 13 ah thu an suah ih, Sakhaan luhcilhnak ih hruaitu le dungthlun zate telin mipum 45 pawl cu CDF – Zotung ihsin kumkhua in kan dawisuak tiah thu an suah.

CDF – Zotung ihsin an dawisuak mi ralkap hruaitu hi Ro Thong Ling, Pa Bawi, Aa Bawi, Moses, Benjamin, William tipawl an si ih, CDF – Zotung Organization phung daan an pahbal hlei ah ngaithiam theihlo sual an tuah ruangah an dungthlun hmuahhmuah thawn CDF – Zotung ihsin kumkhua kan dawisuak ti`n an tarlang.

CDF – Zotung Organization (Supreme council) in cupawl sual a puh mi cu …

1. 2022, February 23 ah CDF-Zotung, Zotung Organization (Supreme council) bylaw kan ṭhiat bal ti`n an phuang.

2. 2022, February 23 ah CDF-Zotung, Zotung Organization (Supreme council) in official Commander in-chief kan pe mi cu a sinak kan hlit sak ti`n an phuang.

3. CDF-Zotung, Zotung Organization (Supreme council) hnaṭuan nak hrang NGO pakhat in kyat ting 50 a hlu mi cu CDF-Zotung pawlkom hmin in an suah ih tlunlam thuneitu an pe lo hlei ah tu ni tiang paisa cazin in hmuh lo.

4. 2021, September 26 ah Ro Thong Lian cu CDF-Zotung aiawh in CJDC ah kan thlah nan, cuih hmun ih thurelmi pawl report pek sal nak nei lo in a um. Curuangah CJDC palai a sinak kan hlit sak nan a hrokhrawl zawngin a pehtlaih sal ih tuni tiang CDF-Zotung palai vekin a thupten a cangvai.

5. Ralthuam leinak hrang ti`n CDF-Zotung hnen ah Ro Thong Ling in kyat ting 1500 a rak suah nan ralthuam lei thu le paisa cazin ceek fel a duh lo.

6. 2022, June 10 ah CDF-Zotung, Zotung Organization (Supreme council) tatyin 1 cu Gangaw PDF pawlkom pakhat thawn kopaw in an luhcilh.

7. Zotung ram khua pawl ah vak in khawmi hnen ah CDF-Zotung, Zotung Organization (Supreme council) zum lo dingin mipi an bum. Khawmi hnen ah inn 1 thawng 5 an khong.

8. Tlunlam thupeknak um lo in Zotung ram pawl ah ceek gate an ong ih mipi le khualtlawng pawl hnen ah an mah hrang liolio sum an khong.

9. Zotung miphun hrang dothlengnak ah CDF-Zotung, Zotung Organization (Supreme council) thawn lungrual ten hnaṭuantlang sawmnak an cohlang lo hlei ah mah le mah doletnak, ngai thiam theih lo sual an tuah ruangah tlunlam ih tarlangmi le an dungthlun zate cu CDF-Zotung ihsin kum khua kan dawisuak ti`n CDF-Zotung, Zotung Organization (Supreme council) cun June 13 ah thu an suah a si.

Cuhleiah Sakhaan an luhcilh ṭum ih ralthuam an lak mi pawl ni 14 sungah kimciangten in ap sal lo cun netahnu ih thil cang ding mi pawl ah CDF-Zotung Organization in ṭuanvo a la lo ding ti`n thusuahmi ah an ngan tel.

Mah le mah Sakhaan an luhcilhaw ṭum ah AK le rifle telin meithal zuun 6 le zian 1000 an la tiah theih a si.

Leave a Reply

Your email address will not be published. Required fields are marked *