CDF – Zanniatram an din thu ah “Thu dik Fel Fai”

Zanniatram le mipi kilhim dingin Chinland Defense Force – Zanniatram an din thu, March 21 ah tarlang a si nan tualsungum Upa pawl cun zianghman an theipi lo thu an rel.

“Khawi nah um pawl in an din ih ziang an tumtah tikhal kan thei lo. Phunhnam hmin hmangin FB cahmai ah thu an suah ka hmu cu ka mangbang zet. Upa ṭhenkhat ka sut tikah zianghman an thei ve lo” tiah tualsungum Upa pakhat in a rel.

Zanniat phunhnam a si ve mi Chin National Organization ih AGS – 1 Timmy Htut khalin hitin a rel.

“Falam peng ih Zanniat pawl an si lo timi ka rel duh. Pawlkom dintu hnen khalah Falam ih um Zanniat pawl in an lo theihpi maw ti`n sut ka duh. Zanniat Tlangtluanhuap pawlkom a si mi Zanniatram Huamhual Pawlkom (ZHP) hnuai ah khua 49 a um. Atu ih an din mi cu ZHP in a theihpi lo hlei ah tha a pe lo ding” a ti.

Dinsuahnak ca an suah hnu, internet cahmai ih comment pawl kan zoh a si le thapelotu an tam ih, a um cia pawlkom cak sin dingin ṭangrual sawn sehla kan hma a tluang ding tiih ruahnakpetu hmuh ding an tam.

CDF-Zanniatram dintu hi zobik an si ti kan thei ciang lo nan, thusuahmi ih ngan tel mi General Secretary phone number cu (+91) India phone code a si. Thu an theh darh nak FB cahmai admin cu Canada ihsin 2, US ihsin 1, Myanmar ihsin 1 tipawl an si ih Online lawngih an din hrih mi pawlkom si in a lang.

Leave a Reply

Your email address will not be published. Required fields are marked *