CDF – Thantlang Police Department in Chin mi hnen in riit theih Siivai an kai

August 5, zaanlam khaw thim hlan ah CDF-Thantlang Battalion-4 (Zahnak Battalion) palik pawl in Chin mi kut sung ihsin riit theih Siivai (heroines-No.4) gram 150 an kai tiah theih a si.

Thangzang le Ruakhua zinpial Check gate ah an kai mi a si ih, siivai phurtu Fungkah khuami Pu Za Hup le Pu Van Za Ham cu atu ah CDF Thantlang kut sung ah an um.

CDF-Thantlang, Department of Information ṭuanvonei mipakhat cun “kyat ting 200 man hrawng si ding ih ruah a si ih Kalay lam ah an lak mi a si. Mizoram Sangau lam ah an phur tum mi a si ih, lamlak ah kan palik pawl in an kai” tiah a ti.

Kaihkhihmi mipahnih cu tuhlan khalah hivek lam sumdawnnak rak tuah cia an si ih, an mah thawn theiaw mi riit theih siivai zuar tu pawl khal kan peng sungah an um lai tiah amahcun a rel bet hrih.

Pu Za Hup le Pu Van Za Ham cu CDF-Thantlang, Battalion-4 thuṭhenzung (Department of Judiciary) ah thu rel sak an si ding ih sual an tuah mi zir in daantatnak an tuah tum tiah theih a si.

Leave a Reply

Your email address will not be published. Required fields are marked *