CDF Mindat in AA hnen raldo an zir mi thu an pholang nak san relfiang

Mizaan, April 26 ah Rakhine ralkap AA hnen ih raldo zirtu CDF Mindat ralkap pawl an ram ah an tlung saal lai zuknung tawi cu internet cahmai ah an thlah darh.

Cumicu kan dung kum 2021, October 23 ih zukmi a si nan kum hrek rei zik hnu lawng ih an pholang saal nak san cu CDF Mindat ṭuanvonei mipakhat in hitin a rel.

“Himi kan pholang nak san cu AA le Chin ralkap pawl hmuaw thiamlonak suakter theitu thuhla pawl Social media ah thlahdarhtu an um ruangah a si. AA ralkap pawl kan ralring a ṭul tivek phungpha in thu tuahmi hmuh ding a um.”

“Rakhine ralkap AA hmusualtu Chinmi ṭhenkhat an um ruangah an hnen ih raldo zirtu kan ralkap pawl an ra kir saal lai zuknung kan thlah mi a si” ti`n CDF Mindat ṭuanvonei mipakhat cun a rel ih “Chin ralkap dang le Yaw ralkap ṭhenkhat khal an hnen ih raldo zirtu an um” a ti.

CDF Mindat in AA hnen ah raldo zir dingin ralkap 30 an thlah ih netabik atangmi ralkap 15 pawl cu AA pekmi meithal ralthuam thawn kan dung kum October thla ah an ram ah tluangten an thleng saal tiah theih a si.

Arakan Army cu Rakhine ralkap an si ih ramri thubuai ruangah le Chinram ih an ralkap pawl cangvainak ruangah Chin mipi ṭhenkhat cun ralhraang dinhmun in an zoh mi hriamkai pawlkom pakhat an si.

Leave a Reply

Your email address will not be published. Required fields are marked *