Dothlengnak hmatluang dingin kan thei tengteng ṭulmi thil THUPI pakhat ….

Tuhrawng, hriamhrei hmangin ralhraang dotu pawl ih sim ringringmi pakhat cu internet cahmai ah buainak lole dothleng cangvaihnak thawn pehpar mi thil phunphun kan tar ṭheu mi hi a si.

Thuhla thar deuh a um cun fim cuh in maw, kiangkap ralrinpek nakah hmangin maw, internet cahmai ah kan hmu mi, kan theihmi hmuahhmuah tlangthannak (speak out) kan nei ṭheu.

Cuvek ca/zuk tarmi ruangah nunnak thap in a thupten cangvaitu pawl buainak an tong mi hmuh ding a tam zet zo.

Tuṭum Mandalay doawknak khal kha inntlun ihsin kiangkap boruak cuan rerotu PDF sungtel pakhat ih zuk an theh darh ruangah ralhraang pawl in an umnak hmun an theisuak mi a si tiah miṭhen cun an rel.

Cumi ruangah caan rei zet paisa hawl khawm in tiṭenṭo ten lei theih fangfang mi an hriamhrei an sung thluh bet ah mino rinsanmi ṭhenkhat nunnak tiang an can phah.

June 25 khalah Yangon ih an cangvai lai hmutu miṭhenkhat ruangah khuasung vak sukso men pawl tiang kaihkhih an tuar phah thluh.

Cumicu Kyeemyindaing ih thil thleng a si ih “mawṭaw pangai pakhat a ra tlan ih meithal an hmet puak” tiah a hmutu pawl in Facebook cahmai ah an tarlang. Cucu, a hmutu pawl in an theh darh sawng ih a rak theivetu le mawṭaw rak zuk man tu ṭhenkhat cun comment nakah mawṭaw zuk tiang an tarlang.

Cumi catar le zuk ruangah June 26 ah SAC ralhraang pawl cun Shwe Gon Daing Tower kiangin mi an bawh ih mikaptu tomi tiih tarlangmi mawṭaw thawn a bangawmi tamzet cu an kham ih kaihkhih tuar khal an um. Kan theicia bangin SAC ralhraang kut khih tuar cun nazikaar sungah hremthat tuar thei kan si.

Speak out tuah lo ding tinak cu a si hrimhrim lo. Speak out ṭhatnak khal tamzet a um ko. Asinan, tlunlam ih kan tar bangin Speak out kan tuahmi hin kan kiang kan kap kan uu kan nau le kan hnaṭuanpi hrangah siatnak a thlen thei pang maw tihi ruat thiam in fimkhurten kan cangvai a si le Dothlengnak ah kan hma a tluang vivo ding a si.

Leave a Reply

Your email address will not be published. Required fields are marked *